首頁 日報娛樂

任主持順便攞料做婆婆 余安安將停工專心迎接乖孫

03/05/2021
■安安姐坦言任主持初哥,習慣演戲不能望鏡頭的她,要適應望住鏡頭講嘢。
■安安姐坦言任主持初哥,習慣演戲不能望鏡頭的她,要適應望住鏡頭講嘢。 (1/6)

  余安安最近首度為TVB新節目《日日媽媽聲》出任主持,拍住羅敏莊和陳凱琳齊齊同圈中媽媽分享心得,雖然跟兩位拍檔初次合作,但安安姐覺得大家出奇地有默契,合作得非常愉快。提到下月將第一次榮升婆婆,安安姐既興奮又擔心,所以錄影完該節目後,會專心迎接乖孫出世才接新工作。  

撰文:杜淑霞 攝影:譚壹致

髮型:Lab two [email protected] kwok 化妝:諺曈‧小白

服裝:MARINA RINALDI

  安安姐收到曾志偉和王祖藍邀請後,認為節目很適合自己做,所以接受挑戰,「個節目元素真係幾啱我做,所以佢哋一搵我係幾鍾意,我又未做過主持O添,挑戰吓幾得意,又唔算有太大壓力,始終自己做咗咁多年媽媽,喺做媽媽嘅所有過程,同埋湊細路仔都算叫做有經驗啦,都有好多嘢可以分享。」

  至於跟羅敏莊及陳凱琳合作,安安姐一樣有讚冇彈,「我哋當然認識,但唔係太熟,但又冇專登去夾過,第一日拍嘅時候出奇地默契幾好,唔知點解個frequency、個默契幾好,所以件事出嚟幾舒服,同埋大家唔同位置講嘢,因為大家年紀唔同,share嘅嘢都唔同。反而我會聽番佢哋最新一輩嘅資訊,可以返去同我個女傾吓,攞定料畀個女。」

  談到即將做婆婆,安安姐自言心情既興奮又擔心,「個女決定咗生BB,跟住睇到佢真係佗BB,我自己好感動,可能我同啲女感情好深厚,非常之錫佢哋,自己經歷過做媽媽,肯做媽媽係件好偉大嘅事,我同佢講嘅時候都眼濕濕,『因為真係唔容易㗎!你肯去負起呢個責任,兩夫妻都唔簡單,因為將來面對生活有好多嘢係好唔一樣,你真係咁鍾意細蚊仔,你又知道將來面對所有嘢,都肯去做呢樣嘢,我覺得好偉大囉!』佢哋未佗嘅時候,決定話要做爸爸媽媽,我都將所有好同唔好嘅嘢,講晒畀佢哋聽,畀佢哋知道要面對啲咩,佢哋知道晒,係好擔心,當然亦都好興奮,擔心始終身體上有好多變化,其實生BB都危險,始終自然生危險性高啲,所以都好擔心佢。」安安姐已決定暫時停工專心湊孫,「雖然佢都有個陪月,但都係睇住吓,就算唔係睇住個BB,都幫手睇吓個女。」

其他文章
hd