首頁 日報娛樂

《疫後冲遊》冬蔭妹繼續晒身材 胡慧冲烈日下拍攝曬燶腳

07/05/2021
■胡慧冲同冬蔭妹齊拍嘅《疫後冲遊》現已於J2台播出。
■胡慧冲同冬蔭妹齊拍嘅《疫後冲遊》現已於J2台播出。 (1/6)

  疫情下冇得出外旅行,觀眾對旅遊節目需求更大,「泰國通」胡慧冲(Roger) 的《冲遊》系列第六輯《疫後冲遊》成為J2台重點節目。新一輯唔止提供疫情後泰國嘅新資訊,仲會加重料,如加多咗好拍檔冬蔭妹着泳裝,大晒32C上圍及39吋長腿片段。胡慧冲笑說:「雖然冇靚仔睇啫,但都有靚女、靚衫、靚景睇呀!」睇咗當去咗,所以觀眾反應唔錯。採訪:方騫平



  《疫後冲遊》現安排於J2台,逢星期一、二、四及五晚九時半播出。今次胡慧冲拍足兩個月,分別去咗曼谷、曼谷旁邊嘅佛統府、巴堤雅、布吉島取景,介紹一吓疫情下經營嘅特式餐廳、staycation酒店等、仲會探討吓港人熟悉嘅旅遊蒲點翟度翟weekend Market丶唐人街、昔日著名夜市Neon Night Market等最新狀況和逆市求存方法。

  因為拍攝時正值疫情緩和時候,跟現況有啲出入,胡慧冲笑說:「唔緊要啦,睇咗當去咗!」他又透露樣靚身材正嘅冬蔭妹,今次再玩盡啲,唔止喺酒店暢泳,仲會扮醜樣、用廣東話跟他互寸,好有火花:「自從拍完比較嚴肅嘅節目《你還好嗎?》後,我患咗『對白NG症』,呢個症狀帶埋嚟呢個節目度,尤其同冬蔭妹一人一句講廣東話,第一集開頭NG咗接近100次。」問到係咪畀冬蔭妹噴血身材影響分咗心?他笑住否認:「唔會喇!我喺現場要兼顧咁多嘢,點會目及佢身材呀!而且合作咗六輯,冇呢啲諗頭。」不過,Roger今次對自己要求多咗,仲拍到曬燶咗雙腳,更因頻頻出入一冷一熱地方搞到病咗3次:「疫情下唔知幾時通到關,但最重要觀眾睇得開心,尤其o依家TVB綜藝節目由『掌門人』曾志偉揸fit,佢最鍾意娛樂同歡笑,將旅遊節目搞得開開心心咪好囉。」

其他文章
hd