首頁 日報娛樂

周柏豪認叻冧老人家最掂 阿Sa自爆心軟兼好易o氹

07/05/2021
■阿Sa和柏豪認為有過上次合作經驗,今次大家顯得更有默契。
■阿Sa和柏豪認為有過上次合作經驗,今次大家顯得更有默契。 (1/6)

  阿Sa(蔡卓妍)與周柏豪繼17年電影《原諒他77次》後,原班人馬再度合作新戲《感動她77次》,今次更加入泰國靚仔演員Mario Maurer飾演兩人之間第三者,阿Sa坦言跟對方以英語演戲有一定難度。講到感動,阿Sa和柏豪自認心軟兼好易o氹,不過亦好叻o氹身邊人開心,兩人特別擅長冧老人家,婆婆和嫲嫲成為主力受惠對象。撰文:杜淑霞 攝影:李維隆

場地:Hyatt Centric Victoria Harbour Hong Kong

  阿Sa和柏豪覺得《原諒》以嗌交為主,今次則要深情戲居多,但阿Sa未被大量喊戲難到,而是被英文對白考起,因要跟泰國演員Mario對戲,「我要同佢講英文,我又做律師,講好難嘅術語,今次真係狂NG,實在太難講啲英文字,平時溝通簡簡單單都話冇乜所謂,拍戲你要好字正腔圓,Mario都好好,佢知我母語唔係英文,有時NG好多次,佢都唔會唔耐煩。」

  講到現實中被感動,阿Sa自爆好易o氹,「我係極度受軟唔受硬,你用軟招就死啦!但唔係求其講『我好愛你』就相信,當我感覺你係真心去講或者為我做啲嘢,我就可以畀晒啲嘢你,攞去!(死穴?)屋企人同埋朋友,可能我冇兄弟姐妹,爹哋媽咪離婚,我好細個慣咗要人哋對我好,要對人哋好好先。」自認極度心軟的柏豪,死穴就是屋企人,「為咗屋企人好多嘢都可以犧牲,好多嘢可以唔理,最緊要佢哋開心安全健康。」

  兩人又話好鍾意o氹人開心,阿Sa說:「我唔係專登感動人,但係非常鍾意o氹人開心,我要對人哋好好,咁我就會賺到人哋對我嘅少少好囉!所以我唔介意做任何嘢。(最鍾意o氹邊個?)我阿嫲好易滿足,90幾歲好勁,佢好搞笑,我嘅樂觀係遺傳自我阿嫲!」柏豪以往最鍾意o氹已離世的婆婆開心,但原來他跟戲中角色一樣冧外母也了得,「同角色一樣幾歲到八十歲嘅老人家都鍾意我(阿Sa:幾歲嘅老人家!)哈哈! 幾歲嘅老人家到幾十歲嘅小朋友我都搞得掂,現實生活我都覺得自己係咁。」

其他文章
hd