首頁 日報娛樂

感激花姐刻薄批評改陋習 張天賦樂見MIRROR有好成績

14/05/2021
■張天賦加盟華納唱片頭炮新歌《Good Time》,YouTube上架三星期,瀏覽量高達130萬。
■張天賦加盟華納唱片頭炮新歌《Good Time》,YouTube上架三星期,瀏覽量高達130萬。 (1/7)

  19年參加《全民造星II》並奪得亞軍的張天賦(MC)得獎後冇簽ViuTV,單打獨鬥年幾終於加盟華納唱片推出頭炮新歌《Good Time》。新歌喺自家YouTube頻道上架三星期,瀏覽率高達130萬,被喻為來年新人獎三甲人選,跟同是《造星》出身的呂爵安(Edan)及曾比特(Mike)爭高下。雖然被睇好,但MC堅持獎項只係花紅,大前提係做好音樂,否則有獎都對唔住自己。採訪:方騫平 攝影:張詠森

  張天賦好鍾意《Good Time》呢首歌:「o依家市面上啲歌普遍都幾沉重,不如做首輕鬆啲,同人打氣嘅歌成為出道作品,亦希望係我出道嘅Good Time!」被問到係咪冇咗「華納一哥」許廷鏗,公司會集中火力捧他,變相係最佳時機?MC答得相當得體:「我反而遺憾未見過佢真人,咁我都希望受到公司愛戴嘅!(想唔想成為「華納一哥」?)暫時仲係新人,未諗到咁長遠,做好自己先啦。」當年冇簽ViuTV,他坦言未Ready好,對未來路向唔夠清晰,直至同華納歌手洪嘉豪、曾若華(JUDE)合作過,覺得同華納唱片好夾,如音樂上,公司由他想點就點,又唔會管制他拍拖,當然是指健康的感情關係。

討厭以前嘅自己

  縱使當日婉拒咗花姐嘅合約,但他唔後悔,仲好替《造星》師兄們開心:「見到姜濤、MIRROR、ERROR、P1X3L、Mike等做到鍾意做嘅嘢,而且有咁好嘅成績令人興奮,尤其香港多返咁多有水準嘅歌手同歌曲係好事。」o依家見返花姐,MC話怕醜唔敢跟她講嘢,但一定會多謝佢:「我絕對尊重花姐,鏡頭前佢講嘢可能尖酸刻薄好難聽,但私下畀咗好多意見我,教我點樣去做星,而且係出於真心,否則鬧我都嘥氣。最記得拍MV當日我遲大到,佢質問我『要成隊人咁等,你唔覺得咁樣會影響到人咩?』當時我態度好傲慢反問:『團隊係要共同進退,咁你問吓佢哋有冇嘢囉?』睇返自己以往藐嘴藐舌嘅囂張行為,都覺得好討厭,有佢訓斥,我先識得改善陋習,成就今日嘅我。」

其他文章
hd