首頁 日報娛樂

自誇跟姜濤成就同樣超越 林作備戰拳賽 禁裕美埋身

17/05/2021
港人出氣
■林作對打拳興趣愈來愈濃,他揚言要揪贏鍾培生,為香港人出啖氣。
港人出氣 ■林作對打拳興趣愈來愈濃,他揚言要揪贏鍾培生,為香港人出啖氣。(1/11)

        林作跟「百億富三代」鍾培生將於9月18日上演百萬拳賽《林鍾大戰》,日前僅受訓3個月的林作參加《Energy Fight 2021拳擊業餘賽》作熱身,雖然於附加賽最終回輸咗,但揚言唔會影響出戰信心。挾住網民急轉彎的支持,林作信心滿滿大聲說:「我一定要打殘鍾培生,要終賠生(命)《賠錢賠命》!」

        雖然《林鍾大戰》尚有4個月才舉行,但兩人連場「牙骹戰」花生指數極高。日前林作與19歲年輕對手黃明雋大戰4個回合:「嗰次喺我哋(教練李俊亨Henry)唔知情下,鍾培生嚟踩場挑機仲做埋直播,指住我哋話『全部都可以knockout』,真係好可笑,佢憑咩呀?其實我係留力策略,主要去攞吓感覺,雖然我成日開玩笑,但經歷過第一場熱身賽之後,我下定決心,一定要打殘鍾培生,因為全香港人都要求我贏,我極度得民心,o依家行過馬路、球場、街上,啲人都要求合照,同我講聲『加油』。」林作自信到爆仲拉埋「ViuTV國寶」姜濤嚟講,他說香港娛樂圈目前得兩個成就超越嘅人,都係兩個字,「一個係姜濤,一個係林作,姜濤喺香港有好多fans,有錢fans買電車廣告同佢賀壽,但林作只得一個超級fans,佢係鍾培生,佢會直接畀『一球』我!」

年幾冇性關係

  講到百萬拳賽,林作自稱有好多必殺技KO鍾培生,他笑說:「講你都唔明㗎喇!」語畢又爆響口:「我唔鹹濕,我唔係成日要搵女搞,所以可以保存好多實力,女友裕美幫我做到嘅嘢,就係唔好搞我!」問到係咪要戒色備戰?他和裕美有默契地齊聲說:「不嬲都少!」林作自爆對上一次「行埋」已經係年幾前:「相比熊貓30秒至5分鐘嘅交配時間,我哋更短,我冇乜呢方面興趣。」對男友「零性趣」發言裕美唔失望:「我冇乜呢啲需要,而且鍾意佢為人好,對我好,睇人唔好睇表面。」

贏獎金開棟篤笑

  打贏鍾培生就可以袋走100萬,而林作已諗定點用嗰100萬:「好多人唔鍾意《培生培心》每月收800蚊會費咁貴,之後又冇乜回饋,好多會員退會嚟搵我買保險,我決定拎部份獎金嚟建立我個《賠錢賠命》YouTube頻道,免費招收會員,一於做大佢。我注定係佢剋星,佢人生由我打贏佢一刻開始走上不歸路,我要等佢學識人生嘅重要一堂『有錢冇用,男子要才多過財』!」另外,林作又諗好贏咗點慶祝:「會完成一個人生小夢想,就係開林作棟篤笑,由鍾培生恰我係文弱書生,再以佢口中嘅Little Girlfriend去揪低佢,到時請埋佢上台燒黃紙叫我契哥,到時一齊笑吓。」林作還加重咗10倍人壽保險:「o依家保額係1000萬,受益人寫裕美,另外,亦會加強保險事業,有呢啲押喺底,就好放心衝去同佢死過!」

採訪:方騫平 攝記:張詠森

場地:Bomber Gym

其他文章
hd