首頁 日報娛樂

狂接10廣告 自稱「ViuTV洪天明」係咁客串 直擊193鬧市拍外景 變Fans見面會

21/05/2021
■在《自肥》中,三爺被時裝雜誌拒絕合作,先決定自肥做新歌,但這日訪問全身都獲名牌贊助。
■在《自肥》中,三爺被時裝雜誌拒絕合作,先決定自肥做新歌,但這日訪問全身都獲名牌贊助。(1/11)

        「三爺」193(郭嘉駿)@ERROR因反擊曾志偉收視言論,被網友封為「娛樂圈清泉」,不但IG追蹤人數暴增,ERROR主持舊節目及熱播《ERROR自肥企画》亦成全城熱話,三爺在節目中親自填詞新歌《睡到三點》,派台即成熱搜榜第2位。當然三爺冇諗過靠講段真心話彈起,狂接10個廣告,仲因ERROR爆紅忙到連原本下月舉行的Talk Show要延至年尾。問到《自肥》播完粉絲超失落,三爺再爆金句:「我哋係ViuTV洪天明嚟,所有節目都會客串!」果然昨日三爺即客串火火主持新節目《生存演技派》,在銅鑼灣街頭拍攝時,粉絲聞風而至將三爺包圍變粉絲見面會,爆紅絕對唔係講笑,大家知佢咩料啦!

三爺彈起,因早前曾志偉指ViuTV收視得4點,題材偏門,只能與旗下J2台比較,同晚三爺反擊:「收視點得嗰幾百部電視機,我哋不嬲都唔介意」,又指「佢哋係畀老嘢睇嘛」,又話J2節目「冇記錯係咪40幾歲仲話後生仔傾偈嗰個」,明踩41歲的陸浩明主持《#後生仔傾吓偈》。

  三爺重申當時用「老嘢」不太恰當,但並非指曾志偉,「我純粹講收視,完全冇提過志偉哥,可能係啲人聯想起,我絕對好尊重任何前輩。嗰刻都覺得有少少講錯嘢,當然唔係數據上嘅嘢啦!用字上可以用得好啲。」事件連帶ERROR也被炒熱,他完全預計唔到,「我係直腸直肚嘅人,咁啱講開大家認同嘅嘢,先咁有共鳴啫!但係好開心,我哋ERROR一直好努力去做好所有嘢,之前節目搏到盡,屎都食過呀大佬,下體成日受傷,曱甴搲到成身爛晒,但《ERROR遊2》播係社會運動,好少人睇,o依家終於有人睇返我哋落力做嘅嘢,幕後團隊都係阿Mike(格仔導演)『無制限OK編集團』做,大家都好鼓舞。」提到新歌《睡到三點》,三爺自誇好抵用,「節目冇乜budget,炸sound bear炸晒啲budget,哈哈!我加埋都係用五位數,(肥仔solo歌嘅十分一?)一百分之一呀!公司畀我做歌係好明智選擇,我搵好朋友幫好平咁做到MV同首歌,女主角都搲到好平,自己寫埋歌詞,我係超抵用,如果畀肥仔嘅價錢嘅話,我出10年歌都得呀!」他仲精心研究用四國語言填詞,「香港Hip Hop文化如果Indie嗰啲要多人聽,一定要MK妹鍾意嘅情歌,總之目標係要洗人哋腦,仲一定要有其他語言。我寫咗兩、三個禮拜,每日就算沖涼,甚至屙屎諗到一句又寫低。」

ERROR年底搞Talk Show

  事件帶挈人氣急升後,三爺順利成就解鎖,獲時裝雜誌邀訪問,一個月內勁接10個廣告,「好開心終於可以做到自己鍾意嘅嘢,又keep到ERROR身份。廣告多咗好多呢個係真嘅,暫時ERROR唔會合體做節目住,做番我哋自己鍾意嘅嘢。(《自肥》完咗觀眾好失落?)你哋唔好咁黐線啦!我sell咗老闆,但係唔知得唔得,本身6月ERROR係有個Talk Show,但而家太忙搞唔掂,或者年尾搞,到時叫公司搞個新節目畀我哋推吓個Show。(你哋紅咗觀眾少咗嘢睇?)唔會嘅,我哋係ViuTV洪天明嚟,所有節目都會客串,就算我哋冇自己節目。」

  昨日《頭條》就發現三爺同火火現身銅鑼灣,原來兩人正為火火和蝦頭主持真人騷《生存演技派》拍攝,火火搵三爺客串幫素人增強自信,「三爺呢啲自信唔知邊度嚟,面皮厚過地球,個學員好冇自信,佢學到193少少都幫助好大,所以今日捉三爺嚟。」問到三爺增自信貼士,「當所有人都係垃圾!(火:頭先仲有四個字好好,目中無人!)係,目中無人,抬高啲個頭就得。」講到客串,三爺再話:「我係ViuTV洪天明,咩節目都做嘉賓,但係我同火火未實際合作過,一齊做主持之類。(火:佢係ViuTV最紅嘅天明,所以先可以目中無人,嗰啲153高度嗰啲睇唔到囉!)我係尊重所有前輩嘅!」

撰文:杜淑霞 攝影:張詠森、梁志明(專訪)

髮型:Leo Fan @Chic Private i Salon

化妝:Rainbow & Cori @Annie G. Chan Makeup Centre 服裝:FENDI (full set)





其他文章
hd