首頁 日報娛樂

傳跟洪永城C君組製作公司 曾志偉染指TVB劇組 推「自家」新劇

01/06/2021
認真對待
■身兼三職的洪永城為拍新劇剃咗個平頭裝,仲晒黑咗兼減肥,不論劇本及造型都好認真。
認真對待 ■身兼三職的洪永城為拍新劇剃咗個平頭裝,仲晒黑咗兼減肥,不論劇本及造型都好認真。 (1/12)

        68歲嘅曾志偉今年初強勢回歸TVB做副總經理兼行政委員會特別顧問,奉命掌管及改革Out晒嘅綜藝節目。志偉「收復失地」3個月,「死敵」余詠珊何哲圖夫婦敗走,正當大家以為「有線幫」冇得留低時,余詠珊昔日愛將洪永城(Tony)突然「升呢」做新劇《凶宅清潔師》監製、編審及男一,可以身兼三大要職,外傳因為曾志偉秘密染指TVB戲劇組給予「親信」機會。日前劇集在尖沙咀拍外景,冇份拍但喺現場監場的Tony就否認《凶》劇同志偉有關。

原來一向百足咁多爪嘅曾志偉,已跟香港史上首套BL劇《大叔的愛》監製兼編審盧思麟(Tommy)及創意無限嘅C君(鄭詩君)成立「勞詩動眾」媒體製作公司,洪永城係團隊要員經常坐埋開會掟故仔,度劇本至三更半夜,然後Sell畀電視台,曾志偉及Tommy最愛Tony嘅新思維及C君嘅鬼才。懸疑驚悚劇《凶宅清潔師》屬「勞詩動眾」產物,由曾志偉低調喺背後發功力推下撮成好事,是TVB拍攝中的13集外判網劇。劇情講述新潮法師洪永城、李成昌及歐陽偉豪(Ben Sir)為客人清潔凶宅,慢慢搵出十幾年前,因為鬼怪事件搞到屋主家破人亡嘅原因。由於題材創新,更被TVB視為《今宵大廈》後突圍嘅神劇。

Tony監場

原先《凶》劇由「勞詩動眾」的盧思麟及洪永城雙監製,Tony順理成章做埋「男一」,C君就主演兼編審。不過,Tony唔想「身份」太張揚,好快將自己除名,仲喺IG上載跟盧思麟及C君合照交代:「介紹返,呢兩位我大佬,兩位都係編審同監製,左邊嗰個C爺教我講嘢,右邊嗰個盧生教我做嘢。至於我,係負責買下午茶嘅,晏啲食乜?」變身幕後指揮嘅Tony日前現身尖沙咀外景場地打點,目及吓傅嘉莉及Ben Sir拍攝情況,相當緊張。Tony強調唔想以監製做噱頭,反而着重劇本要紮實。對於盛傳劇集同曾志偉有關?Tony即尷尬避談:「總之套劇唔關曾志偉事,盧思麟係By Project做,我亦唔方面交代勞詩動眾嘅股東情況。」

C君邀拍

        當日拍攝場口講述半紅不黑嘅KOL傅嘉莉(Kelly)為咗求Ben Sir合作,喺車門及車內同幾位助手拉拉扯扯,唔畀Ben Sir離開。作為女一嘅Kelly好進取,唔止晒腿及纖腰,仲喺大熱天氣下喪跑、起飛腳,仲攬住阮政鋒相當入戲。她對本報記者說:「為咗保持fit爆狀態冇啖好食,好慘。」而着住西裝嘅Ben Sir熱到流晒汗,仲話可以同年輕人團隊合作好開心。問到可有改吓劇本?他即說:「我邊敢改呀?呢次係最多戲份嘅角色,試過想改少少台詞嚟寸吓闊太,但編審C君話,劇情係要硬食富豪畀你嘅嘴臉,咁講出道理來,我咪要投降囉。」Ben Sir透露C君找他拍劇,「佢話一路寫一路諗住我,大家從未合作過,可能腦電波有共鳴,佢提我眼神要堅定啲,拍呢套劇學到好多嘢,我對佢好有信心,亦知道洪永城係監製,反而冇理過創作團隊背景。」Ben Sir仲大讚劇集得意位係唔使有真鬼,靠氣氛嚟打造懸疑及驚嚇性都好吸引。

採訪:方騫平 攝影:梁志明

其他文章
hd