首頁 日報娛樂

印度爆疫 新德莉莉至親中招 喬寶寶做義工籌款助家鄉

04/06/2021
■戲中仔女成家宏、新德莉莉夾計扭「爸爸」喬寶寶耳仔,感情唔錯。
■戲中仔女成家宏、新德莉莉夾計扭「爸爸」喬寶寶耳仔,感情唔錯。 (1/7)

  由印裔Sri Kishori執導嘅首部港產Bollywood電影《我的印度男友》上映首個周末,榮登中文片票房冠軍,喬寶寶日前拉埋片中仔仔成家宏(Karan Cholia)、女女新德莉莉及導演食印度菜慶祝,四人更示範用薄餅當匙羹去舀咖喱雞食。

採訪:方騫平 攝影:譚壹致 場地:Curry Leaf Indian [email protected]佐敦茂林街

  喬寶寶最buy陳欣妍(Shirley)冇女神包袱,就算用手食嘢都零詐型,跟足導演模式去用手指捲飯及撈汁,一take過搞掂晒。對於陳欣妍被指經過宇宙大進化變身西施,片中有得同Shirley錫錫的成家宏就避談話冇研究,亦唔會去睇返Shirley以前個樣,總之o依家佢係印度西施。喬寶寶笑住打圓場說:「咁女大十八變,女仔會keep fit,經過後天補救會變靚,好似我咁都進化緊,提前做聖誕老人啦!」不過,他笑言喺父親眼中,永遠係「囡囡」(新德莉莉)最靚:「呢啲全部係觀點角度問題,正如香港女仔鍾意青靚白淨嘅韓星,我哋印度型男大多數係留鬚。」

導演一周失三好友

  提到印度近月疫情相當嚴重更成為世界焦點,寶寶兩公婆大部份親人已離開印度,而導演Sri Kishore傷心自爆一星期內失去3位好友,聽到死訊開始變到麻木;新德莉莉慨歎舅父、婆婆等9成至親都中咗招,還幸已康復中,不過,她擔心到連電腦都唔敢開,寧願採取逃避態度,都唔想再聽到親友不幸嘅消息,至於男主角成家宏在印度的親友尚算ok。稍後喬寶寶會喺印度餐廳做義工,籌款援助印度抗疫,實行有錢出錢,有力出力。今次印度疫情大爆發,4人喺香港不但冇被歧視,更獲得唔少關心問係,感受到人間有情。

其他文章
hd