首頁 日報娛樂

首做舞台劇包台前幕後三餐 黎瑞恩演蠢秘書對馬浚偉改觀

05/06/2021
(1/7)

  48歲黎瑞恩於8年前發現胰臟有兩個良性瘤,醫生當時跟她說除了做手術切除冇其他方法,並忠告她:「你以後開心啲嘞!」近日小恩子發燒兼肚痛入院,她以為時日無多,經檢查後胰臟的兩個瘤竟神奇消失。小恩子經已出院,心情靚爆的她好開心地繼續投入舞台劇《男人40 CEO》的綵排。採訪:方騫平

  因為受疫情影響,由馬浚偉投資、編、監、導加主演嘅舞台劇《男人40 CEO》由去年9月公演,順延至6月11日至6月26日於香港藝術中心上演10場。目前排練得如火如荼。第一次做舞台劇的小恩子演一個冇乜腦的私人秘書「朱玉珍」,遇上寸嘴mean爆CEO的故事。馬仔話角色非小恩子莫屬,因為現實中的她是一個冇機心嘅人。

邀請三次先答應

  到底馬仔點樣去打動小恩子獻出第一次?他笑說:「其實早喺《偶然徐志摩》時,我都問過佢有冇興趣玩?佢即耍手話『梗係冇啦!激死你都似,我唔記得嘢㗎!』當時我心諗,佢真係黐黐哋(線)喎!今次係我第3次邀請佢演出,解釋除咗個劇啱佢外,仲想幫到同業有工開,最後感動到佢,仲拍心口話由排戲到演出,所有食飯、零食由佢包起,甚至會提供埋湯水畀台前幕後。」

  小恩子笑指馬仔的確煩咗佢好多次,她坦承:「其實之前我聽過馬仔唔少壞話,而佢有直接同我解畫,解釋『呢個世界做乜都會畀人話唔好,去到戲劇圈子更複雜,每次同50至100人開工,總有人服你,有人唔服你。』不過經過今次合作,我對佢改觀咗,因為佢個人好有心,冇扮嘢,仲好體貼。」

其他文章
hd