首頁 日報娛樂

《調教你MIRROR》 入Camp前虛構環節瞞花姐 梁祖堯Tiger誤解姜濤唔睬人

08/06/2021
■Stanley、Alton、Tiger、Jeremy、Jer和Frankie 跟祖祖拍完《調教你MIRROR》已成為好朋友。
■Stanley、Alton、Tiger、Jeremy、Jer和Frankie 跟祖祖拍完《調教你MIRROR》已成為好朋友。(1/12)

無論係唔係鏡粉,MIRROR早前在演唱會脫胎換骨表現外界有目共睹,12位成員都異口同聲話全賴拍了梁祖堯的《調教你MIRROR》,令他們變得更加團結,間接令演唱會更吸引。祖祖自爆開頭度橋時,連花姐都瞞埋,而一班仔仔亦抱住零信任入camp,不過《調教》時個個喊到豬頭,祖祖就話冇乜神奇妙法,只係一班朋友飲住酒傾心事就嚟料。不過他要求隊中最唔熟的姜濤和Tiger每次見面都要傾偈確實有效,Tiger認為跟姜濤關係有改變,祖祖笑指他對姜濤都有改觀,以往以為他嬲了成村人好cool,原來認識後發覺反差好大。撰文:杜淑霞 攝影:譚壹致

祖祖表示決定開《調教你男友》時唯一要求是全部要玩真,「《調教》宗旨係要一個真嘅真人騷,唔可以有任何嘢係夾,夾我係唔做嘅,所有嘢都係要真實發生,花姐佢哋又肯將呢件事真實發生喎!甚至乎好遲先知我哋去邊度拍,花姐開會有嚟問『其實件事會做啲咩』(Stanley:其實佢哋開會係假。)最後尾嗰次開會係特登為花姐,差唔多出發前3、4日,嗰啲同花姐講嘅嘢係假㗎!(瞞埋佢?)瞞埋!其實都度緊,度咗頭3、4日,會畫吓畫、追吓牛、攝吓影咁,全部嘢都假,因為花姐個工作係保護佢哋,我哋又唔可以令到花姐失職,唯有要令到佢唔知情,佢先放心。」

「調教」過程中MIRROR成員個個喊到豬頭,祖祖話冇妙法專登令12子喊,「我哋唔係做啲戒酒治療,喊完畀掌聲!我諗係互相信任,有時如果你當咗自己係導師,就同佢哋高高在上有差別,但其實大家都係做朋友啫,講真我去酒吧都會對住啲朋友成日喊,我冇咩秘訣,你真心對人人哋真心對番你。」Jer說:「阿祖佢唔係真係教我哋一啲演技上面嘅嘢,(祖:根本冇教過,其實我哋成日飲酒之嘛!)佢教我哋好赤裸去表現自己,如果作為一個表演者,你喺舞台將你最赤裸嘅自己擺上嚟,冇話好真實技巧,純粹每個人最真嘅自己放出嚟。」Stanley補充:「同埋阿祖係有啲靈異體質,佢係好sensitive,知道你未係好真講出嚟,仲有啲嘢block住咗,有啲說話可能抑壓咗我哋心底好耐,當一釋放情緒就會好決堤。」不過講到信任原來最初MIRROR對祖祖和製作組完全零信任,「第一次見面我哋喺酒吧度一齊飲嘢,佢哋個個喺度摸吓啲枱底睇吓有冇啲機關,啲啤酒又聞吓係咪尿呀!(Jer:以《Mirror Go》嘅情況嚟講,係要溝啲辣椒醬,唔會咁順攤)用咗4日先至令佢哋真係相信畀佢哋嚟放假。(Alton:你仲做戲,你哋仲扮嘢,哈哈!你諗吓佢一個人畀12個人唔相信個壓力係好大,哈哈!)我哋冇諗過《Mirror Go》對於佢哋個烙印係咁大。」

排舞更快手

講到入camp前後跟隊友關係轉變,Tiger覺得同姜濤最明顯,在camp時祖祖要他們「每次傾五十句偈」仲有keep住做,「不過發覺同我想像中嘅佢冇乜分別,哈哈!只係傾偈,但我接受咗呢個人,佢都接受咗我,原來佢鍾意運動睇戲,佢睇好多戲,你唔傾偈唔會知。(以前做一日嘢係咪一句嘢都冇講?)冇㗎!(祖祖:招呼都會打啩?)招呼都唔打,你知佢成日帶住耳機,好似嬲咗成村人咁。」祖祖都認同,間中在化妝間碰面的姜濤好cool,「佢有種氣場係你唔好搞我,o依家知道佢應該係好肚餓,因為佢做嘢之前係唔食嘢,我肚餓都係咁樣,入到camp認識真正嘅佢,呢條友低能㗎喎!原來低能都唔足以形容佢,佢係一個比細路仔更加細路仔嘅人,其實呢個反差點都係我自己偏見,我都冇嘗試過去了解佢。」

Stanley認為入camp令整隊MIRROR關係改變更大,「演唱會嗰時我哋更加肯定好彩有呢個camp,令我哋更加團結,如果冇咗呢件事個騷唔會咁好睇囉!我覺得係一直冇一個地方、時間、人物去令到我哋12個一齊溝通,導致到一啲現實出現,誤會加深,又磨滅咗團魂,大家根本就冇嘢。(有冇鬧交?)我哋唔會對住咁鬧,o依家有個機會畀我哋坐低溝通件事,咁小事就冇嘢啦!」Jeremy更舉例指排舞變快,「我哋有時排舞,譬如有動作唔齊,我會唔夠膽講嘅,但係我明明見到個問題,會唔夠膽講,好似會hurt到佢,好多事咁我又唔係隊長,好似應該係隊長做或者跳舞叻嗰班人做,入完個camp之後我會直接話呢度大家一齊執執佢,大家為件事好,唔會驚產生咩誤會,所以我可以直接講。」

其他文章
hd