首頁 日報娛樂

老婆行開咗 沙灘家庭樂遇一號波 黃浩然面燶睇實囝囝同帳幕

12/06/2021
■浩然畀個沙灘帳幕搞到一肚火,見到太太即狂呻,囝囝就最開心有浮牀玩。
■浩然畀個沙灘帳幕搞到一肚火,見到太太即狂呻,囝囝就最開心有浮牀玩。(1/10)

        要數圈中好好先生,45歲黃浩然肯定係其中之一,同形象指導太太莫家嘉(KaKa)2005年結婚16年以嚟,浩然完全零緋聞,誕下兩個仔仔後,工作以外一切以家庭為重。剛剛拍完新劇《家族榮耀》的浩然,昨日(11)又出動陪太太及兩個仔去沙灘享受家庭樂,由於下午天文台發出一號戒備信號,沙灘特別大風,但太太行開咗,搞到浩然一邊要睇實兩個仔游水,一邊又要顧個沙灘帳幕,兩邊走好鬼忙,好好先生都變得面燶燶躁躁哋! 採訪:張詠森

        浩然前年簽約古天樂旗下經理人公司後,工作接唔停,剛剛又完成跟張智霖、羅子溢(羅仲謙)和楊茜堯(楊怡)夫妻檔合作新劇《家族榮耀》,近日終於可以放假休息,當然第一時間陪屋企人,見近日疫情回穩,昨日又難得冇乜落雨,於是一家四口去南灣同陽光玩遊戲。

睇見都覺得攰

  黃氏一家下午3點幾到達沙灘,浩然同太太相當合拍,兩人先夾手夾腳開好個沙灘帳幕,浩然就擺低晒啲行裝,太太就幫兩個小朋友搽太陽油。本來一切安排得好好,浩然仲即刻除掉上衣,大晒結實肌肉,但同行友人囡囡整傷隻腳,KaKa即陪伴去救傷站治理傷口,順便攞兩個仔個浮牀去打氣,於是就行開咗。

  本來浩然一個人照顧住兩個小朋友落水玩,完全冇難度,不過由於掛起一號風球,海灘不斷吹起大風,沙灘帳幕特別食風,差點被吹起,浩然顧得睇住囝囝落水玩,又要不停目及住個帳幕,其間仲試過幾次帳幕差點被吹走,在水邊陪囝囝玩的他要急急腳走返上沙灘整好個帳幕,搞到囝囝要大叫他,他怕囝囝失禮即做動作叫停,呢幕睇見都真心覺得幾攰。

  浩然同個沙灘帳幕大戰咗幾個回合之後,疲於奔命的他見到太太終於現身,即時頓起一家之主格做決定,向KaKa呻話:「可唔可以唔要個帳幕呀?係咁風起呀!」KaKa當然尊重老公意見啦!不過,兩個仔仔一於好少理,因為媽咪已吹好浮牀有得玩啦!

其他文章
hd