首頁 日報娛樂

44歲做歌手被網民留言鬧咁老仲唱 陳展鵬霸氣反擊︰你咪唔好聽囉

15/06/2021
自知不足
■陳展鵬自覺做歌手有好多不足之處,所以他坦承:「如我係老闆,都未必會簽自己,有錢寧願做啲有意義嘅事。」
自知不足 ■陳展鵬自覺做歌手有好多不足之處,所以他坦承:「如我係老闆,都未必會簽自己,有錢寧願做啲有意義嘅事。」(1/10)

5年前,陳展鵬成功挑戰視帝寶座,3年前展開人生新一頁結婚生女,今年再下一城,踩入樂壇做「天盟娛樂一哥」,推出新歌《零歲》。44歲才出歌,展鵬坦言未進攻先捱轟:「網民留言話我『咁老就咪唱啦!』,言論自由嘅,但我都有選擇,可以delete留言同Block。」不過經常被網友取笑的展鵬身經百戰,霸氣反擊,「唱歌又冇犯法,影響到你咪唔好聽囉!」

採訪:方騫平 攝影:梁志明

化妝:Gabbie Lee 埸地:唯港薈 Hotel ICON

陳展鵬新歌《零歲》係唱畀「前世情人」小豬比,希望囡囡做個Happy Baby,「歌詞真係好到肉,係我嘅心聲,最初畀個headphone小豬比聽,佢興奮到由個心笑出嚟,見到佢咁嘅反應,我都好開心。」

老婆聽練歌話聽到好攰

  陳展鵬於21年前曾簽過寶麗金(現時環球唱片),跟陳奕迅、謝霆鋒同期出道,但只在雜錦碟出過單曲,o依家才算圓歌星夢。不過,目前香港樂壇年輕化唔同晒,作為「老新人」嘅展鵬坦認格格不入:「其實唔好講喺娛樂圈,就算外面都會分開年齡層,大家唔想接觸大家嘅嘢,好彩我老婆單文柔唔out,佢喺屋企聽到我練歌,搖晒頭話『點解唱得咁慘、咁用力嘅?聽到我好攰,o依家啲歌唔係咁。』係佢提點我要去學咬字同埋唱歌,事實上用90年代嗰一套係唱唔到o依家啲歌,o依家啲key唔止偏高,好似散文咁,好有含意。」

反擊被評成身亞視娘味

  展鵬預咗出歌會被評頭品足,他坦承:「有網民問我『點解無端端要去唱歌?』甚至話我『咁老就咪唱啦!』網上文化言論自由,講嘢好直接。不過,做人要懂得消化同分析件事啱唔啱,如我鍾意食魚生,唔通香港唔興就唔食咩?唱歌又冇犯法,影響到你咪唔好聽囉!如果過份評擊我咪delete留言,再嚟人身攻擊,我就會Block,我都有得選擇評語㗎嘛。」他又不吐不快:「正如網民話『陳展鵬隔住個mon都聞到亞視陣娘味』、『有一種連鏹水都洗不走的亞視娘味』我係喺亞視做過,喺入面學到好多嘢喎,咁『好亞視』有乜問題?既然唔係個個認同,只好做實事。而且,我覺得音樂唔分年紀同男女,最緊要有共鳴可以感動人,麥當娜年紀夠大過我啦,佢咪一樣出新歌?」

開心香港樂壇百花齊放

  因為做歌手,陳展鵬o依家好留意樂壇:「最Like林家謙作品,仲有張進翹(Manson)、Dear Jane、郭偉亮等,MIRROR好值得留意,因為天時地利人和,好難得香港有隊組合有追星嘅感覺。樂壇需要唔同元素,由當年譚詠麟同哥哥,到四大天王,咁先會百花齊放。」他認為,唱歌有新嘢玩,有嘢學,個人才會有進步:「拍劇演來演去都係警察、醫生、律師,我都有好大壓力,惟有喺角色上加入新元素。」

其他文章
hd