首頁 日報娛樂

愛上演戲唔介意剃頭做宅男 Anson Lo為角色可以全裸

15/07/2021
■AL認為做演員就唔應該有包袱,所以冇底線是基本。
■AL認為做演員就唔應該有包袱,所以冇底線是基本。(1/11)

        身為偶像難免有包袱,而MIRROR身為當紅偶像男團,偶包更加難免,呢期憑劇集《大叔的愛》飾演暖男「阿牧」爆紅的Anson Lo(盧瀚霆、AL),經常被評為keep靚仔樣勁厚粉,畀人感覺偶包超重,不過未來想多向演員路發展的AL同《頭條》話,由拍《大叔》開始早已掉低偶包,講明唔怕嘗試任何角色,就算好似《調教你MIRROR》時最驚嘅鬚根露額頭look演出,一樣無問題,有需要甚至好似梁朝偉一樣全裸拍《色戒》亦接受到,為做好演員絕對冇底線。不過唔知一班「神徒」又接唔接受到喎!?

AL同Edan(呂爵安)這對《大叔的愛》的「登神CP」,近期頻頻孖住現身,日前出席活動更搞到fans迫爆商場,AL直言好珍惜同Edan一齊開工機會,「未厭呀!的確公司有個order,唔可以成日『登神』出現,我唔知咩原因,但係唔可以吓吓我哋兩個一齊出嚟,我都同呂爵安講,我哋每次一齊做嘢好開心,會好好珍惜嗰啲時刻,同埋知道近排fans好想睇我哋,上次個event係出道以嚟其中一個最開心嘅工作,大家好熱情歡呼。」最近推出《大叔的愛》片尾曲《不可愛教主》MV,AL竟然放棄實現同靚女主角錫錫機會,提議搵Edan幫手演出,「呢首歌冇諗住派台,錄完真係好鍾意呢隻歌,公司開完會都覺得呢隻歌幾好聽唔好嘥,派台拍MV都有諗過不如完全唔關《大叔的愛》事啦!拍個同女仔嘅戀愛故事,但係我再諗番係自己斬斷咗個機會,大家都覺得係關《大叔》事,應該回饋番《大叔》有少少關係,做個喺平行時空『阿田』同『阿牧』故事。」

錄音時險失聲

  不過AL自爆錄《不可愛教主》時面臨失聲邊緣,所以壓力超大,「錄到第3個section,花姐車我返屋企,佢問我做咩唔講嘢,我嗰時其實好擔心,一來擔心隻歌錄唔好,呢隻歌我係寄予好大期望,因為我好鍾意《大叔的愛》套劇,我唔想有機會唱片尾曲唱衰咗,同埋正值演唱會前一個禮拜,我未睇醫生已經feel到自己把聲頂唔順,我o依家呢個狀態會唔會令嚟緊所有plan都要擱置呢?花姐嗰時有講不如同監製講唔唱片尾曲,但我好堅持,做咩無嗱嗱放棄!(有擔心演唱會?)MIRROR其他兄弟都講幫你幕後代唱,但係我solo個表演冇得幕後嘛!咁耐冇開演唱會,大家都好期待,但如果出到嚟就算我跳舞幾型都好,但我把聲唔得!花姐有提議將個MMM校好大聲,但我唔要同全世界講我唱唔到,不如直接cut咗我solo算。」

  AL雖然對唱歌好有要求,但《調教》時要唱歌同演戲二揀一,他竟然揀演戲,因他對演戲興趣愈來愈大,「呢一刻真係鍾意做戲多過唱歌,我係想鑽研演技多啲,《大叔》令我覺得好好玩,可以活第二個人生,呢個感覺好奇妙。我用3個月時間覺得Anson Lo消失咗,『阿牧』視角去睇嘢,就算我返到屋企都覺得自己係『阿牧』。」AL仲想試更多不同性格角色,「我諗好多觀眾好有興趣Anson Lo仲可以做到啲乜嘢,譬如我想試啲好粗魯、好衝動嘅年輕人,同埋好宅男,陰暗面好重嘅人,同Anson Lo反差好大嘅。(可唔可以《調教》時鬚根見額頭Look?)其實我想試,我都有同花姐講,傾嚟緊project髮型唔使keepo依家咁。(光頭?)得㗎!冇所謂,你叫我完全唔化妝,叫我剃頭,完全OK,因為for一個角色,我覺得就係要撇甩自己盧瀚霆嘅嘢。(冇乜底線?)冇乜底線!(全裸,好似梁朝偉拍《色戒》?)for一個好啱嘅原因咪得囉!譬如個戲份上你要全裸先表達到你呢個情緒,或者呢個劇情,我都唔抗拒。(冇偶包?)冇,就算做『阿牧』好暖男,有人覺得等如偶包,你問我係咪一個咁暖嘅人,100%為人着想、犧牲自己都未必做到,我都會有情緒,『阿牧』情緒可能冇我對住媽咪發脾氣個情緒咁多,我都有撇開我個偶包去投入『阿牧』個角色。」

撰文:杜淑霞 攝影:譚壹致 形象:PIPA Creative 髮型:Denny [email protected] Private I Salon 

化妝:Giann [email protected] G Chan Makeup Centre 服裝:Versace、Giuseppe Zanotti

其他文章
hd