首頁 日報娛樂

帶新女直擊布吉島通關情況 胡慧冲讚「布吉李嘉欣」唔怯場

17/07/2021
■胡慧冲布吉島推廣之旅換上省鏡新拍檔「布吉李嘉欣」,網民都好受落。
■胡慧冲布吉島推廣之旅換上省鏡新拍檔「布吉李嘉欣」,網民都好受落。 (1/7)

  泰國政府宣佈7月1日起於布吉島推出「沙盒計劃」,畀已接種兩劑疫苗嘅低風險國家或地區旅客,抵達後唔使隔離。作為居泰港人嘅胡慧冲(Roger)第一時間帶埋外表甜美兼有火辣身材嘅新拍檔「布吉李嘉欣」飛去直擊。採訪:方騫平

  「泰國通」胡慧冲由《冲由泰國》開始跟32C冬蔭妹拍住上做旅遊節目,Roger強調唔係貪新忘舊要換新女,只係冬蔭妹冇期參與,而布吉妹英文都ok,對住鏡頭着泳衣,大晒33C、26、36身材都表現自然冇怯場,網民畀晒like。

四圍去唔怕染疫

  問到同冬蔭妹比較邊個索啲?他大笑說:「呢個問題好敏感喎,兩個各有千秋啦!布吉妹有新鮮感啲,個樣係甜嘅!」今次胡慧冲應泰旅遊局邀請到布吉島做宣傳推廣工作,去咗7日6夜,期間影吓當地靚酒店、米芝蓮一星餐廳、Spa、街頭小食及當地最新民生情況等。他無奈說:「因為疫情關係,有啲店舖執咗笠,但都有新嘢補充,而且陽光與海灘及低消費,對歐洲旅客有一定吸引力,至今反應算係幾理想。其實今次計劃對泰國政府嚟講係大膽嘗試,始終打咗針唔代表係百毒不侵,但布吉島好靠旅遊業,唔可以再坐以待斃。」

  另外,7月15號蘇梅島重開,泰國其他省府亦會逐漸開放。遊客漸多,問到Roger可會擔心染疫?他自言時運高:「呢年幾都冇停過去拍嘢,乜高危地方都去過晒,甚至有次去剪完頭髮,隔咗兩個禮拜髮型屋經理打嚟問我身體狀況?原來當日幫我剪頭髮嘅師傅中咗招,當日我仲冇戴口罩,佢就有戴,但冇傳染畀我,可能我做得善事多所以咁好彩啩!」

其他文章
hd