首頁 日報娛樂

逾百粉絲入樂園追MIRROR 姜濤勁隊Churros 歎港女Tea

19/07/2021
食大支嘢
■「姜son CP」一同拍攝食Churros的場口,為食姜濤仲食咗3、4條,粉絲就笑他食「大支嘢」!
食大支嘢 ■「姜son CP」一同拍攝食Churros的場口,為食姜濤仲食咗3、4條,粉絲就笑他食「大支嘢」!(1/12)

  人氣男團MIRROR五位成員姜濤、「教主」Anson Lo(盧瀚霆,AL )、Jer(柳應廷)、Stanley(邱士縉)及Jeremy(李駿傑)昨日現身主題樂園拍片,吸引逾百「鏡粉」購票入場追星,場面墟冚!席間五子分兩組拍攝,「姜son CP」再度合體,兩人孖住食Churros又歎港女Tea,見經理人花姐(黃慧君)冇嚟監場,出名為食的姜濤趁機大啖狂擦,露出一臉幸福食相!採訪:張詠森、錢文坤

        昨日,MIRROR於清晨時份抵達樂園作準備,本來睡眼惺忪的他們一埋位即展現精靈樣,相當專業。當中姜濤與Anson Lo湊成一組拍攝,令久違的「姜son CP」 再度合體,拍攝期間,見人氣劇《大叔的愛》中飾演「阿牧」的AL買Churros(吉拿棒)和飲品畀姜濤,在場粉絲即笑他拎住「大支嘢」!接過Churros後,姜濤即興奮地大啖狂食,連AL也被其幸福食相吸引到向他索食;最後連同NG,姜濤足足食了3、4條!之後,AL獨自去玩「玩具兵團跳降傘」,站在一旁的姜濤全程舉機拍攝, AL就扮驚詐嬌,兩人互動甜蜜無極限。

Cut機繼續食

  移師玻璃餐廳取景時,AL又識做地對「核心範圍」外的粉絲「派糖」,令餐廳瞬間變成動物園,大批粉絲隔住玻璃窗一睹偶像風采。接着,他與姜濤在餐聽拍攝歎Afternoon tea的場口,可能見花姐唔喺身邊,鏡頭前已飽擦一頓的姜濤難得冇王管,Cut機後仍企埋一邊繼續食,相當可愛!

落雨終止拍攝

  至於另邊廂,Stanley就捉細膽的Jeremy去挑戰「灰熊山極速礦車」,後者驚到乸埋口面兼踎低用腳撐住,死唔肯上車, 場面爆笑;冇份玩的Jer就拎住部機,一邊拍住Jeremy「受死」過程,一邊「食住花生」等睇好戲。直至傍晚5時許,五子才合體一起站在城堡前拍攝看匯演,戴上口罩的他們跟着表演起舞,樂在其中,未料大約拍了15分鐘,突然下起傾盆大雨,大會隨即停止拍攝,以免發生危險。

其他文章
hd