首頁 日報娛樂

拍《逐流時代》慘俾黎紀君打 旨呈演咀戲壓力更大

21/07/2021
■旨呈要畀黎紀君出拳打,他講明叫對方不用留力,但角度問題要拍了幾次。
■旨呈要畀黎紀君出拳打,他講明叫對方不用留力,但角度問題要拍了幾次。 (1/6)

  由亞洲心動娛樂出品、戚其義擔任監製兼執導的網劇《逐流時代》,早前已正式煞科。劇中《全民造星III》的旨呈(鄺旨呈)首次在劇集飾演重要角色,演繹二世祖「Leo」,他坦言今次角色相當乞人憎,差不多每個有關係角色都會打他,這天探班他就要俾黎紀君出拳打,不過這個動作場面都不及咀戲令他壓力更大。撰文:杜淑霞 攝影:梁志明

  劇中旨呈跟林耀聲和黎紀君等組成樂隊,由於屋企有錢旨呈成為樂隊經濟支柱,「老竇不停畀錢我夾band,佢想我繼承佢一啲嘢,但係我一路好反叛,好玩世不恭,用音樂嚟麻醉自己,不過成日唱歌都唱唔到好渣!」問到同現實是否剛相反?旨呈即停了不敢答,搞到林耀聲和黎紀君齊齊大笑,之後他再搞笑補句,「現實都係廢人一個。」

跟戚其義合作好緊張

  由於旨呈恃住是大水喉,就算勁冧黎紀君一樣對女方不忠兼且出賣對方,這天就是拍攝黎紀君出拳打他發洩戲份。黎紀君說:「我同旨呈之間有啲衝突,我之後同阿聲做情侶,性格都變化好大,開頭好倔好硬同阿聲一齊之後變得好柔,好想依賴對方,係幾得意嘅角色嚟。(佢融化你?)可以咁講。(聲:我曬咁黑咪融化到佢!)哈哈!」三人講到初次跟著名導演戚其義合作,心情特別緊張,阿聲說:「開頭都會好緊張,以為戚導演係好嚴格同好惡嘅人,但其實佢好從容,好知道自己要咩嘅導演。」

  原來全劇旨呈不止一場戲畀人打,「發覺呢個劇由第一集到最尾嗰集可以數吓我畀人打咗幾多次,今日都唔止一次,我有一次機會打人,但大部份我畀人打,可能太乞人憎。今日都打得甘,今朝我畀人用木棍打,除咗黎紀君、(黃)德斌同林耀聲,基本上同我有關係嘅人都打過我。」不過相對動作戲,旨呈拍被咀戲似乎更加緊張,拍攝前完全不知對象是誰,他更一度以為要咀嘴,「好彩係咀面咋!本身話要咀嘴我有啲尷尬,因為我自己係熒幕真係未試過,都有啲緊張,但後尾導演話錫面啫!」

其他文章
hd