首頁 日報娛樂

劍擊代表首度參加奧運 佘繕妡以平常心衝擊獎牌

22/07/2021
■在大學選修商科的Kaylin,對做KOL都有興趣。
■在大學選修商科的Kaylin,對做KOL都有興趣。 (1/6)

  20歲奧運劍擊港隊成員佘繕妡(Kaylin) ,6歲開始接觸這運動,由最初不懂打法,到成為全職運動員代表香港拿下不少獎牌,她坦承已離不開這項運動。今屆東京奧運首度出戰的她,坦言好想衝擊獎牌,但不想給自己太大壓力,會以一向參賽的平常心態去面對,因她認為過程得着重於勝負。撰文:杜淑霞

攝影:譚壹致        場地:五糧液大酒家

  從小男仔頭性格的Kaylin,6歲被媽咪安排下學劍擊,「好搞笑,嗰陣時讀書要揀一個課外活動,唔係我揀係媽咪揀先『你咁男仔頭不如試吓』,我嗰陣時鍾意整啲紙嘅劍同槍,鍾意同啲男仔玩。」最初她對劍擊只是一知半解,轉捩點是12歲時教練建議她由花劍改打重劍,「佢見我亂咁打唔跟住進攻同反攻去打,重劍一拮到就有分,如果同對手同時拮到大家都有分,其實係好似鬥,對手唔好掂到你,但你掂到個對手咁,我好鍾意呢種感覺。」往後Kaylin成績愈來愈好,更以14歲之齡,挑戰亞洲23歲以下錦標賽,「唔記得攞咗第三定第四,加埋其他年齡賽事排名,就開始入咗體院訓練,都好驚,23歲以下即係有啲20、21歲嘅師姐,同埋都冇諗過咁快會入到體院去練習。」

  Kaylin在16至19歲成為全職運動員,直到去年到美國入讀聖母大學(University of Notre Dame)商科,她直言曾經因太攰想過放棄劍擊,但一次受傷休息幾個月後,反而令她認清不能放手,「我會打唔到先至唔打,除非有啲傷令我冇辦法打到落去。」對於今次首度參加奧運,Kaylin雖然想奪獎,但不會給自己太大壓力,「去到奧運梗係想攞牌,奧運係運動員生涯最Top嘅比賽,係人都想攞獎牌。心情係好緊張,但又好想打比賽,因為已經成年冇打過比賽,除咗喺美國打過美國大賽,冇乜大賽見到其他國家對手,所以好期待。好多人問我有冇信心同目標喺邊,我諗諗吓覺得都係唔好諗太多,諗得太多變咗太緊張唔係咁好,應該用平常心態去面對。點講都好,過程重要過你去贏,打咩比賽都好,如果打得唔好去贏,你都唔會知贏啲乜嘢,過程入面學到多啲嘢,你知邊個訓練模式最適合自己,咩嘢幫到你或者對你冇咁好,過程好重要,係令你成長同埋成熟。」

其他文章
hd