首頁 日報娛樂

傳返內地拍真人騷 杜德偉珍惜時間湊仔食好嘢

27/07/2021
■Alex早前跟AJ父子裝去郊遊。
■Alex早前跟AJ父子裝去郊遊。 (1/7)

  下年60歲的杜德偉(Alex)傳將加盟內地真人騷《乘風破浪的姐姐》的男版《哥哥的滾燙人生》,稍後北上搵銀的他趁4歲兒子AJ放暑假,將時間畀晒囝囝,陪住對方周圍食同玩。早前《頭條日報》記者就撞到Alex帶為食AJ去又一城食Tea,AJ仲食到成嘴白汁,Cute到暈!採訪:譚壹致

  當日約下午4點,杜德偉與太太李曉冰(Ice)帶埋囝囝AJ,相約商台DJ雲妮及另一男友人,到又一城食Tea。Ice與雲妮邊食邊傾好投契,將頂杏色Cap帽反轉戴的Alex,就主力專心食麵和撳電話,間中先搭句嘴。未幾食飽的Ice忽然再Order嘢食,原來男友人湊埋AJ嚟會合爹哋媽咪,剛K2畢業的AJ好叻仔,唔使媽咪監督,都可以自己專心地拎住支叉捲意大利粉食,不過肥嘟嘟的他食到變污糟貓,勁得意,最終要媽咪幫手抹嘴仔。

杜氏夫婦好鍾意食Tea

  食飽急去廁所,在旁跟男友人傾緊公事的Alex,立刻戴番口罩陪囝囝去wee-wee;放完水的AJ好輕鬆,大搖大擺揈住手仔、拖住爹哋行返餐廳,而Alex似乎都見怪不怪。最後逗留約一小時,一行5人終於埋單返屋企。而另一日下午3點半,杜氏夫婦再現身同一間餐廳,與一名女友人食Tea,其間3人交換手機睇相,暢談甚歡,傾足一個多小時才埋單走人;沿途行去洗手間時,兩個女人繼續雞啄唔斷,Alex就默默尾隨又搞吓頂Cap帽,去完廁所兩公婆便乘7人車離開。

其他文章
hd