首頁 日報娛樂

拍《刑偵日記》太入戲郁啲忟憎 姜皓文被老婆勸睇精神科

28/07/2021
■黑哥提起掛住老婆掛到心慌慌的日子,竟然眼濕濕想喊咁款。
■黑哥提起掛住老婆掛到心慌慌的日子,竟然眼濕濕想喊咁款。(1/10)

        演員向來都係攞自己情緒來搵食,有時太投入角色,好易搞到情緒失控,連經驗老到、外界大讚演TVB劇《刑偵日記》出色的黑哥姜皓文,原來拍完成年都抽離唔到憶妻成狂患上躁鬱症的「聶山」角色。黑哥自爆當日為瞓身投入演「聶山」,又驚疫情嚴峻影響家人,拍攝兩個多月專登搬去酒店獨居,慣咗有全屋「女」陪突然對住四面牆,講番呢段掛老婆掛到甩肺日子,向來man爆的黑哥竟忍唔住眼濕濕,而他拍完該劇情緒起伏依然好大,太太殷寧更提議他搵精神科醫生幫手。



外界大讚黑哥演「刑偵之父聶Sir」掂,更推舉他問鼎視帝,而黑哥本身亦認為演的躁鬱症角色同劇本都好正,「躁鬱症病發之前係非常之冷靜,只不過佢有一點會忽然間情緒高漲,好興奮,如果咁樣嘅情況之下撞到啲唔開心事,就會將佢擴大,會一發不可收拾,會情緒高漲到標冷汗又暈,嗰吓會控制唔到自己,同埋會諗好多負面嘅嘢,所以我覺得個劇本好正,你係好難會撞到電視劇會寫到一個咁正嘅劇本,我睇完劇本我去演嘅時候係驚嘅,一路驚住返工唔識演,因為真係好難演。」

未能抽離掛住老婆

  曾透露過有時太入戲,搞到情緒差影響夫妻關係的黑哥,見到今次角色難,加上疫情影響,不想太太、家中6隻狗女及貓女增加染疫風險,索性自我隔離搬到酒店住,「我開工接觸人多,屋企好多小朋友,有貓貓狗狗,如果佢哋要隔離佢哋好慘,佢哋要掉咗去唔知咩地方隔離,所以一定唔可以畀佢哋有事,唔可以畀屋企有事。我呢次直情返唔到屋企,除咗疫情,我自己安排咗自己隔離,想一個人對住個劇本去做呢個狀態。」

  這段自我隔離冇得見家人的日子,黑哥提起都怕怕,「拍咗兩個幾三個月,同老婆分開自己隔離咗,一收工對住幾面牆同張牀,老婆或者姐姐送飯畀我食,送完佢哋就走,劇本會有我同陳煒嘅夫妻戲,幻覺會見到我老婆,唔知佢喺邊,但放工返到去又真係見唔到我真正嘅老婆,我試過忍唔住打畀我老婆,『你可唔可以過嚟,你不如買碗糖水我食啦!』(好掛住佢?)係呀!(你講起都眼濕濕喎!)諗起都覺得心慌慌,到o依家都屈住喺度唔知想點咁,個畫面又係咁,個劇本又係咁,所以個人唔知係咪抽離唔到,但係我覺得呢樣嘢每一個戲都會發生,只不過呢排成日都《刑偵日記》,所以過一段時間可能會好啲囉!」

享受為角色犧牲

  原來《刑偵》煞科後,黑哥為安全起見,再隔離多兩個星期才返家,但他覺得為了好角色犧牲都好值得,「嗰兩個禮拜就放鬆少少,老婆多啲落嚟睇吓我,戴住口罩可以出去見吓面,可以去露台出面,但係好享受嘅,演員嚟講曾經有個劇本可以令到你挑戰自己嘅情緒,挑戰得咁厲害,係開心嘅,但係要唞一輪先,我要拍喜劇呀!」到真正返屋企,最搞笑是得黑哥自己開心,「嘩!好開心!但佢哋對我冇乜嘢,太太對我又係咁,所以好跳(情緒)囉!個感覺好得意,我返到去佢哋當若有其事,(得自己興奮?)係!好似好新鮮咁,攬住我最細嗰隻狗仔,個人平伏番,接番屋企嘅生活。」

  不過原來黑哥返屋企後,情緒依然受角色影響好深,搞到太太殷寧建議他睇精神科醫生,「我老婆話我未拍之前都要調整情緒,佢都話想安排精神科醫生畀我睇,到拍完之後我老婆話,『你真係要睇吓醫生』佢咁講我就驚啦!唔係嘛!因為我有時少少嘢會歇斯底里,好少事都會唔開心,容易忟憎,容易小氣,容易唔開心,唔知係咪更年期。」黑哥暫時未有真正求助精神科醫生,因相信靠自己可以調節到心情,「我覺得可以調教嘅,可以調教番開心啲,或者釋放啲情緒,唔好咁多嘢抑壓,我諗係得嘅。」

撰文:杜淑霞 攝影:譚壹致 髮型:Jeff Wu 化妝:Herry Lai

其他文章
hd