首頁 日報娛樂

對唱歌表現仍未滿意 陳柏宇拜師提升技巧

02/08/2021
■被外界封為「隱世高手」的Jason,原來對自己唱歌表現一直都不滿意。
■被外界封為「隱世高手」的Jason,原來對自己唱歌表現一直都不滿意。 (1/7)

  陳柏宇(Jason)最近推出全新專輯《53 FPS》,專輯中加入Jason鍾愛的電影元素,不過早前Jason為鋪排宣傳新碟,專登清空社交平台,一度令fans誤會偶像出事,Jason也始料未及。被外界封為「隱世高手」的Jason,原來對自己唱歌表現仍未滿意,大半年前竟開始搵老師學唱歌提升技巧,新碟可睇到他的轉變。 撰文:杜淑霞 攝影:譚壹致

髮型:Alex So@ The attic 化妝:Jessica Chan 場地:Room 53 丁方體驗房



  Jason解釋專輯用《53 FPS》是有特別意思,「『FPS』係拍攝電影時候用到嘅格數,我哋起初討論呢隻碟嘅時候,因為我自己好鍾意睇電影,希望喺今次專輯音樂入面表達到嗰個電影感, 而『53』就唔係平時拍攝時用到嘅格數,用呢個數字係想喺呢個框架裏面做一啲獨特啲嘅嘢,又可以屬於自己嘅嘢,用5同3係我第一張專輯推出時就係5月3號。」

清空ig嚇壞fans

  為了配合這次新碟宣傳,早前Jason專登清空ig,但這個突然舉動卻引起fans好大反應,「我都唔知點解會嚇親人!(有冇諗過會咁?)冇呀!對我嚟講又唔覺得改變某一啲嘢去做呢件事,只不過係用咗一啲以前冇用過嘅方法去做,無論喺製作專輯或者宣傳專輯呢件事入面。」

  宣傳方法改變外,專輯中大家還會發現Jason的音質或者唱法上的轉變,因早在大半年前他在小肥推介下,搵了同樣的歌唱老師Guddy學唱歌,「搵老師之前自己都有上網自學咗兩、三個月,之前跟過不同老師,但唔係一段長時間,可能之前都冇咁嘅悟性去諗唱歌係咩一回事,都係偏向做到,享受就得啦!但係疫情期間太多時間去諗吓嘢,去思考吓嚟緊日子裏面,喺呢個行業仲想做到啲咩,就去學唱歌,呢個年紀同呢個經驗去學都有着數喺度,但都係好迷茫,因為唱歌係件好抽象嘅事,但係就會好過我早5、6年前心態,經驗多咗自己好清楚自己想要啲咩。」自言現在唱歌信心大了的Jason,但仍未敢孭起「隱世高手」,「都係人哋稱呼,因為我自己唔係咁睇,我一向都知自己唱歌嘅能力去到邊度,唔係外界覺得嘅嗰個能力。」

其他文章
hd