首頁 日報娛樂

入行要減肥 做瑜伽辛苦到爆粗 ATV阿儀自稱靚 所以爆紅

05/08/2021
招積笑容
■阿儀話自己笑得唔好睇,所以平日木口木面,但聽到網民留言話:「我愛你。」就露出招積笑容。
招積笑容 ■阿儀話自己笑得唔好睇,所以平日木口木面,但聽到網民留言話:「我愛你。」就露出招積笑容。(1/12)

        37歲黃花閨女薛影儀憑獨特樣貌及氣質挑戰今屆亞姐,雖然入唔到圍,但紅爆網絡,網民齊集氣令「氣質儀」成功獲ATV簽約兩年,月入有4位數仲有佣金O添。對於被封亞視一姐,仲有埋應援會!阿儀信心滿滿說:「可能我靚!」對於網民的支持,阿儀最開心有Fans留言:「我愛你!」說畢還展露激罕招積笑容。採訪:方騫平 攝影:梁志明 場地:Meg Latin Yoga@金巴利中心

        阿儀被Fans捧為「阿儀不紅,天理不容」,多job多都爆燈,除咗做宣傳,仲要唱live、拍美容廣告、遲啲仲會拍埋戲。今次《頭條日報》記者安排本身都幾厚肉嘅阿儀去挑戰做瑜伽,見佢做得都好吃力,搵食係艱難㗎嘞。

辛苦玩到唞晒大氣

  當日導師先指導阿儀做一啲基本熱身動作,再趴低身貼地爬行做舒緩脊髓,最後向較高難度進發就係玩高空瑜伽,教她做正身及反身倒吊動作,可惜阿儀手腳唔協調,不時撻低喺地蓆上,更做到唞晒大氣,要由經理人示範及打氣鼓勵,再同導師夾手夾腳協助阿儀完成動作。期間阿儀不停講:「哎呀!真係攰,嘩!真係攰到我!」屢敗屢戰後,一頭亂髮嘅阿儀忍唔住細細聲爆粗:「係囉,真係好×攰!」笑爆全場。問到能否捱得住娛樂圈咁艱辛的工作?她細細聲:「捱得住嘅,再嚟啦,但仲未拍完嘅?」事後記者問到她對講粗口的睇法?她說:「係囉!啲人(留言)討厭囉!」記者反問:「但你自己都爆粗喎!」她卻不語,然後發出哎呀聲,未答完就走去搵手機,搞到公關都要提醒她說:「阿儀,禮貌啲!」

讀到中五成績唔講

  對於網民喜歡阿儀有純真一面,她信心返晒嚟:「係啦!佢哋覺得我外表好囉!」仲大大聲說:「我都有信心(發展),我個樣都唔算差,有啲人靚過我,有啲人醜過我,身形有啲人肥過,(下刪百字)。」再問覺唔覺被人取笑?她說:「吓?唔知佢哋,唔會覺得,我個人樂觀。其實我瘦10磅就ok,唯一有黑眼圈,下面棚牙有啲疏。」至於被指雙乳下垂?她即否認:「我覺得ok,係啲網民亂講嘢。」由於阿儀常問非所答,她的智商同樣受關注,對此她反問:「仲咩呀?(讀書OK?)係呀,我喺元朗鄉中讀到中五,會考成績係點?唔講得啦。」

TVB挖角都唔會去

  問到覺得自己紅唔紅,阿儀坦言:「啲fans話我紅囉,(啲人話你紅過姜濤)係呀!我唔知佢哋呀!各人有各人睇法囉!可能睇我外表靚。」她又自爆有fans要求跟她合照及送花膠燕窩。她又說可接受着泳衣拍戲,但唔接受拍牀戲,咀戲就視乎劇本,但私下可接受婚前性行為。今年4月她曾投考TVB演藝訓練班不獲取錄,問到TVB係咪跌眼鏡?她即投訴:「係囉唔知佢哋呢!嗰日有千幾人面試,由朝等到晚嘥時間,樂易玲只係問咗我姓名、年齡及職業,第日TVB撬我都唔過去,等咁耐都唔去啦。」

其他文章
hd