首頁 日報娛樂

《七公主》演出獲激讚 陳曉華由喊包變享受角色

10/09/2021
■Hera對於網民激讚未敢自滿,認為演出只是剛合格。
■Hera對於網民激讚未敢自滿,認為演出只是剛合格。 (1/7)

  陳曉華(Hera)最近在話題劇《七公主》雖然出場僅數集,飾演的「胡映雪」被強姦後更跳樓自殺,在結局周只以幻覺形式回歸,仍贏盡網民讚賞。回想去年首部演出劇集《迷網》被狂踩戲屎,她坦言當時曾變喊包,但現在亦未敢太開心,不過曾搵彭秀慧等導師惡補演戲的她,愈來愈識享受投入角色。

撰文:杜淑霞 攝影:葉君海 場地:The AIR (The ONE)

  Hera 獲網民讚是顏值高的鬼外,又大讚她演技大躍進:「真係脫胎換骨,啲戲好自然、又到肉、表情又準,唔會誇張」、「做戲好咗」、「期待佢繼續進步」、「佢同馮盈盈都好大驚喜,證明付出咗努力」。 對於外界好評,她未敢自滿,「好開心,自己驚喜比較多,未播出之前都有睇過嗰場法庭戲,我覺得啱啱好合格,冇大家講得咁好,大家對我好大鼓勵。法庭戲做得咁順都要多謝監製同導演,因係連續三日去拍,情感上投入容易啲,同埋佢哋指示超清晰,好容易跟住去做。」

  相對於去年《迷網》推出時的負評,今次反應天壤之別,Hera反而慶幸曾經歷低潮,「我以前好怕事,就係不停有呢啲評語令我要面對同解決,而唔係避開,去行一啲安全嘅路,一定要諗用咩方法處理,究竟係睇完唔開心,定係睇完諗辦法解決等大家改觀,我最後選擇諗辦法解決,咁就令我廿幾年生活模式變咗。」不過她坦言面對負評爆喊後,都要花一段時間才能積極面對,「佢哋話嘅嘢全部都要解決,譬如演技唔好、唔夠自然、或者講嘢太快。演完《七公主》我就演《異搜店》,之後休息嗰段時間,我搵咗兩個老師去學戲,希望可以快啲見到成效,不過比起以前拍戲係冇咁緊張,容易投入好多。」

  學戲後,Hera不諱言對演戲信心大增,現在不但識享受投入角色,更想挑戲反差極大角色,「特別係啲冇乜接觸過嘅角色或者性格,我會更加享受。之前我演角色係比較斯文,女仔啲,想試吓做多啲運動、男仔頭或者打女,奸角都想試吓,總之同自己反差大啲角色都想試。」

其他文章
hd