首頁 日報娛樂

10個月大小糯米太得意 Robynn難平衡湊B與工作

11/09/2021
■Robynn在佗B時已錄好《尚有》這歌,就是怕自己掛住湊B不想再唱歌。
■Robynn在佗B時已錄好《尚有》這歌,就是怕自己掛住湊B不想再唱歌。 (1/7)

  葉晴晴(Robynn)離開Robynn & Kendy獨立發展後,去年佗住BB下先後推出3首英文歌,最近趁住B女Naomi(乳名小糯米)10個月大,Robynn推出單飛後首支廣東歌《尚有一堆理由顯出我優秀》,既為重新出發的自己、也為大家打氣。不過她笑指要兼顧工作和湊B好難取捨,因小糯米太得意,她不想錯過任何一刻,所以暫時都學習緊平衡兩方面。

撰文:杜淑霞 攝影:葉君海

髮型:EveChiu@W.work.shop 場地:@tuvehote

  去年Robynn在疫情下加上佗住BB,先後推出3首英文歌《Lost Forever》、《Fifth of May》及《Little Love》,原來《尚有》在她佗B期間已錄好,「錄呢隻歌時都驚自己,會唔會生完之後成個心態所有嘢轉晒,唔想再出嚟分享自己音樂呢?我偏偏喺就嚟生得時錄好咗呢首歌,去提醒自己如果生完後唔去plan佢嘅MV或者宣傳,係對唔住隻歌,咁樣自己谷番自己走番出嚟。」

以新人重新出發

  今次新歌《尚有》Robynn繼續親自作曲,搵來陳耀森填詞及蘇道哲編曲及監製,兩位製作人先了解她創作時心態再配合,「嗰時經歷緊好多轉捩點,離開唱片公司,離開組合嘅角色,有好多舊有包袱,但都可以從新開始。我同填詞嘅森仔講想歌詞直白啲,令到觀眾好快代入,好快有個出發點聽呢隻歌,過去呢年大家都係經歷緊好多轉捩點,好多嘢突然之間唔同晒,點樣掉低晒以前所有唔開心,好似一個新嘅人繼續行,呢首歌唔係離開公司變咗個人嘅意義,而係同時間我係一個媽媽,要繼續去信仲有一個夢想,尚有好多埋由去繼續行。」

  Robynn坦言小糯米出生後,心思都放在她身上,要平衡工作不容易,「見到佢個心就融晒,覺得冇嘢比佢重要。今日化完妝都唔想出嚟,頭嗰半年我真係圍繞住佢生活,唔記得自己schedule,淨係記住佢幾點食奶瞓晏覺,帶佢去游水會唔記得除自己面層衫就跳入泳池,加上我個性又比較懵,哈哈!我盡量唔會連續兩日做嘢,每日最重要moment係夜晚佢沖完涼,去餵奶o氹佢瞓覺。」

其他文章
hd