首頁 日報娛樂

辭任TVB要職後密密見 余詠珊約杜之克食Tea傾到皺眉

13/09/2021
■唔知杜之克呻緊乜,聽到Sandy面有難色。
■唔知杜之克呻緊乜,聽到Sandy面有難色。 (1/7)

  TVB早前大變天,繼前助理總經理余詠珊(Sandy)於4月底離職後,前副總經理(戲劇及節目)杜之克亦於本月2日離任。自曾志偉新官上任後,節目和人事均全面革新,近日宣佈農夫成員C君(鄭詩君)升呢J2台創意總監外,由2017年播映至今、Sandy在J2的「遺作」《#後生仔傾吓偈》也將於本月結束。上周五(3日),遠離鬥爭的Sandy和杜之克相約到又一城食Tea,前者聽後者狂呻仲聽到皺晒眉。採訪:譚壹致

  同是前TVB執行副主席及集團行政總裁李寶安愛將的余詠珊和杜之克,早前被讀者撞破於觀塘餐廳傾密偈,事隔3個多月,《頭條日報》記者於上周五晏晝4點左右,在又一城The Night Market又見到二人約埋食中菜。其間,背住鏡頭的杜之克講到揈晒手,似乎都幾勞氣,坐在對面的Sandy就聽到皺晒眉又密密點頭,等杜之克呻到飽,輪到Sandy開始發表偉論,而面帶笑容嘅佢就明顯輕鬆得多。

超市急行15分鐘

  之後騷一騷手機個時間,估計Sandy都夠鐘返屋企煮飯,於是除咗副眼鏡Check單,仔細望兩望,OK冇問題就畀錢走人。杜之克先行離開,由高層變番師奶仔的Sandy獨自搭扶手電梯到底層的超市買餸,先去四圍揸吓啲蔬菜試手感,最後揀了一籃生菜、湯料、麵包及卷蛋蛋糕等,行咗15分鐘就埋單然後急急腳蓋埋車飛,就去停車場攞車離開。

其他文章
hd