首頁 日報娛樂

佗B坐余曉彤船出海險遇意外 梁諾妍甜呻洪永城好囉嗦

27/09/2021
■Hidy向Inez傳授佗B經,籲多吃黑芝麻粉及飲紅豆水。
■Hidy向Inez傳授佗B經,籲多吃黑芝麻粉及飲紅豆水。 (1/7)

  33歲梁諾妍(Inez)今年7月下嫁洪永城(Tony),同時宣佈「造人」成功,預產期為12月。向來熱愛運動的她早前大住肚慢跑8公里,被網民狂鬧佢鹵莽,Inez強調問過醫生冇問題,仲有助胎兒健康發展!其實懷孕初期,Inez曾跟余曉彤(Hidy)為香港開電視節目《碧波遊浪記》任主持,二人出航尋本地海洋秘境期間曾遇驚險場面,自問大膽的Inez都嚇親!撰文:黎寶倫 攝影:沈健程 服裝:ZARA(梁諾妍)

化妝及髮型:Inez Leong (梁諾妍)、NC MAKE UP(余曉彤) 場地:THE WAVE

  花了五年時間終考獲船牌的余曉彤,即以「船長」身份接拍《碧波遊浪記》,未料首日「自駕遊」便差點撞船,不諳水性的「水手」梁諾妍笑說:「我都見過世面,唔係好怕死,但原來喺Hidy手上有(接近)死嘅感受!」本來半小時抵達的目的地,因Hidy不斷扭軚「S」字行,最終花了數小時才到,Hidy解釋考船牌只需筆試合格,毋須實戰,「我以為好易,點知揸上手一扭成架船會擺,同埋會Delay,加上風同海流,啲湧浪會推你埋一邊,好複雜。」

  當時佗B未夠3個月的Inez捉住隻船係咁嗌,幸未有催谷害喜,亦沒有同老公報告,「佢知我出海拍,叫我玩得開心啲。」提到懷孕仍跑步又冒險,Tony也曾留言叫小心啲,她即放閃笑說:「每次產檢老公都會係咁問清楚,醫生都話跑步冇問題。佢都好照顧我,開始有少少囉嗦,每次落斜路都提我『你自己一個行嘅時候一定要捉住個欄杆,我上次就差啲跣親』,佢知我好論盡周圍撞。」

  早年佗B爬山又潛水的Hidy,認為大肚婆做運動冇問題,最緊要做足安全措施量力而為,更鼓勵讓小朋友一早接觸大自然,「囡囡一個月已經帶佢上獅子山,我孭住佢當重力訓練,慢慢令佢熱愛大自然,跟住就一齊跑山、游水,佢可以喺沙灘衝一日浪,好似多咗個Buddy。」在旁的Inez聽到也不停嗌正。

其他文章
hd