首頁 日報娛樂

死過翻生 增肥100磅再開Show 張偉文仲唱到唔想靠社福

04/10/2021
笑得開懷
■等咗兩年,Donald回復狀態仲可以開到show,終於識笑。
笑得開懷 ■等咗兩年,Donald回復狀態仲可以開到show,終於識笑。(1/12)

        4年前,「靚聲王」張偉文受腰椎毛病困擾體重急跌至100磅,瘦到驚現「筷子腳」。好彩患難見真情,得好友方俊悉心照顧,家陣長肉至200磅逐漸回復狀態,今年尾及明年初仲會開3場個唱,他笑晒報喜:「冇得唱歌等於一個廢人,只係靠社福撐住條命都幾恐怖!」

64歲嘅張偉文(Donald)將會喺今年12月20日、明年1月12日及14日分別喺香港文化中心、沙田大會堂及元朗劇院舉行《友情有義演唱會》。日前身兼Donald保母及個唱表演嘉賓嘅方俊(Aman)在家中宴客,更約埋環星娛樂老闆張國林,「環星一哥」尹光齊齊陪Donald食飯為他打氣。

肥番坐唔落電動輪椅

  Donald近年行動不便靠輪椅代步,就算上落私家車,甚至如廁都帶點困難,喺演唱會宣傳期間,Aman請咗猛男助手,負責推出推入貼身照料。Donald當日現身街市買餸大受歡迎,菜檔姐姐向他揮晒手打招呼,海鮮檔阿姐請他食海鮮:「想食乜呀?唔使錢任攞!最緊要健康。」Aman取笑他是「街市殺手」,Donald露出滿足神情說:「唔好咁講,大家畀面啫!」而做咗成日嘢嘅Donald當晚有啲攰,連記性都差咗,啱啱去完廁所又話有啲急。不過,見Aman、張國林及尹光玩得咁high,都有加入戰團jam番兩句《相思淚》、《紅燭淚》及《荷里活大酒店》,仲好好胃口勁食Aman為他煮嘅「笑蝦蝦」牛油果蟹肉沙津。咁好胃口難怪Donald心廣體胖,o依家體重回升咗百幾磅,條腰粗咗10吋,更有雙下巴及大肚腩,仲因為超磅坐唔到電動輪椅!

有「肥仔聲」最啱開Show

  Aman指張偉文再開個唱係幾大鼓舞,因為他於2016至2018年接受咗兩次腰椎大手術,術後頸椎退化令雙腳冇力,多次跌倒撞親搞到腦積血,2019年要入院放血續命!Donald直認記性差咗:「跌過個腦真係唔得,所以o依家要小心啲慢慢諗嘢,唔好行差踏錯踩落個氹度!」Aman話Donald唔攰時反應比較快,加上翻肥,多番啲口腔肌肉,呢啲『肥仔聲』特別圓潤,係開演唱會嘅最佳時機。Donald亦對演出有信心:「我唔覺自己有好大問題,平日都曲不離口娛樂自己。」Donald停咗兩年冇開個唱坦言好唔開心:「最緊要有得唱歌,有得搵食仲覺得自己係有用,否則等於一個廢人,o依家有啲其他收入會冇咁擔心,而社福資助只夠養我條命,o依家唔使成日好似鬼追人咁(求福利)。」在旁的Aman指社福資助唔夠cover生活,其實他每月有補貼張偉文的老人院開支,只不過冇同佢講。

採訪:方騫平 攝影:沈健程

其他文章
hd