首頁 日報娛樂

Busking到個唱太不可思議 吳林峰開騷減磅關媽咪事

09/10/2021
■阿峰將個唱定名《明天一切如常演唱會》,因覺得大家入場看完騷未必會有大改變,但至少心態上會有所不同。
■阿峰將個唱定名《明天一切如常演唱會》,因覺得大家入場看完騷未必會有大改變,但至少心態上會有所不同。 (1/6)

  吳林峰出道兩年多,由Busking到下周16日在麥花臣舉行個人騷《明天一切如常演唱會》,擁有首個舞台他覺得好不可思議,又開心行到這步能實現對自己承諾。他形容這個騷就好似自己第一個BB,所以除了狂做音樂做準備,還狂做運動減磅望變fit登場,他又解釋扚起心肝減肥,原來跟吳媽媽有關。   撰文:杜杜 攝影:葉君海

髮型及化妝:Kaho Cheng 服裝:A[S]USL

  由在街頭Busking到有個人演唱會,阿峰最開心能實現對自己承諾,「我覺得噚日仲喺公園仔度唱緊歌,原來已經行咗一段路,做到好多畀自己嘅承諾,譬如我同自己講過揀定咗呢條路就唔好放棄,到而家我都未有呢個念頭,我同朋友講過有場自己騷就會一齊上台,我喺音樂路好感恩身邊有好多人同我一齊玩。同埋以前好多人笑我,個名關係我叫林峰,啲人笑我唔係林峯,我成日少年輕狂咁講『你等住頒獎禮會見到我個名』,我心態唔係攞獎,至少《叱咤》我行出嚟真係有我個名,原來唔係咁鍾意我嘅人慢慢會欣賞我,但係我冇話諗住要令佢哋改觀,只係證明我唔係hea做,唔係用把口講我有幾努力。」

為個唱積極準備

  籌備個唱心情,阿峰形容是「興奮得嚟又緊張,緊張得嚟又驚」,就似第一次當爸爸,為此他近日勤練歌及跟老師學習唱歌外,還將寫給別人的歌重新編曲,希望到時不似作品展方式去演繹。另外他還積極減肥,望由現在87kg減至理想的80kg上台,不過他解釋由最重114kg扚起心肝搣甩肥肉,原來跟演唱會冇關,「未知有呢個騷嘅時候我已經減緊肥,原因係今年好想有啲嘢係付諸行動,唔想得個講字,我由中學畢業到而家次次都話減,同埋上年我媽咪有啲身體不適,又有啲朋友有病,影響自己有啲嘢想攞番啲火去做,決定今年做番多啲運動,想自己keep番好少少狀態同健康,我覺得個騷係一個階段結束同開始,我想呢個階段用最好方法去擺個逗號。」除了健身、跑步同打籃球外,他還「揀飲擇食」配合,「戒咗唔食比較肥嘅,牛都盡量少食,食雞、魚、蝦,同埋唔食咁多油同埋澱粉質嘢食,如果忍唔到口都會偷食吓,但你知係偷食會食少啲。」

其他文章
hd