首頁 日報娛樂

寫《石山派》望能自成一派 石山街恨頒獎禮集郵兼表演

11/10/2021
■石山街對於出席頒獎禮,只抱着志在參與心態。
■石山街對於出席頒獎禮,只抱着志在參與心態。 (1/7)

  由謝旻良(Marstn)及楊彤組成的組合石山街,繼《暗戀家》和《幻象》後,今年推出第3首單曲《石山派》,他們希望每個人都可行自己的路,自成一派,也希望他們的音樂可以做到「石山派」。臨近年尾,將會首度參與樂壇頒獎禮,他們坦言對獎項沒大期望,楊彤只想趁機跟前輩集郵,Marstn就盼上台表演。 撰文:杜淑霞 攝影:沈健程

  Marstn和楊彤都承認製作《石山派》,確實希望音樂能自成一派,楊彤說:「有時我哋整完都會覺得好好聽,一定可以上榜,但畀監製或者行裏面大佬聽完,佢哋只會話幾得意,幾有你哋特色,但未必上榜。」Marstn補充:「呢啲comment成日出現,咁不如索性將我哋呢個想法,攞去做首歌嘅標題,石山派,自己一派。」

  提到今次首度跟填詞人鄭敏合作,楊彤竟然變花癡狂讚對方,「我本身都唔係好識鄭敏,係監製講完之後,每次見到都嘩!咁樣㗎!鄭敏係白雪雪戴眼鏡嗰啲,好高,啲皮膚超好,好似一個古裝劇入面嗰啲美男子。(Marstn:下次你拍MV佢做主角?)你唔使喺入面。(記:有冇問鄭敏意願先?)喺呢度問,好唔好鄭敏?」當然鄭敏除了靚仔,填詞亦有一手,Marstn說:「我記得第一次睇份詞,已經fit到成個氛圍,有個氣場喺度,唔使聽音樂都覺得好型,加埋音樂覺得成件事好夾。」

  講年底各大頒獎禮,石山街在3首作品較睇好《石山派》成績,不過對於有否機會上頒獎台,楊彤坦白話:「我都唔知點計!我諗住好靚姿態出現,諗吓着咩衫化咩妝,諗吓同邊個friend一齊坐,諗定後台同咩人打卡,噚日啱啱個騷見到周國賢,但大家忙緊做準備出場,錯過咗打卡影相機會。」Marstn想集郵外,仲另有目標,「個個前輩都想見,但而家感覺好怪,以前冇諗過會咁見到,要喺報紙或者電視先至見到,而家好神奇喺後台就見到。我最想有得去玩,有得上台表演。」

其他文章
hd