首頁 日報娛樂

當年心臟病發險變植物人 Joe Junior仲有得開Show多謝個天

15/10/2021
■環星娛樂即將為Joe Junior推出第3張唱片。
■環星娛樂即將為Joe Junior推出第3張唱片。 (1/7)

  Joe Junior喺疫情下等足兩年半,鐵定本月25日及11月1日分別於沙田大會堂及文化中心舉行《POP LEGEND JOE JUNIOR IN CONCERT》,主辦商環星娛樂原先邀請李樂詩擔任嘉賓,可惜她確診患上乳癌。從而令Joe哥回想5年前死裏逃生經歷,更差點變成植物人,諗起都驚。採訪:方騫平 攝影:沈健程

  從小熱愛唱歌的Joe Junior經歷過高高低低,形容有10幾年喺大海浮沉等人救上岸:「我唔夠靚仔,但又有好多女仔追,啲人唔抵得咪唱吓你,踩吓你囉!有啲人甚至會揸住雞毛當令箭,出現一啲唔公平現象,明明喺個宴會有得唱變咗冇,識唱歌又開唔到演唱會!嗰時年紀仲細,返到屋企會好委屈咁爆喊。壓力日積月累,加埋年紀大,太勞累最終大病一場。」

  Joe哥重提當年患上冠心病的恐怖經歷:「嗰日喺桑拿房因為透唔到氣入咗私家醫院,但過百萬通波仔手術費真係負擔唔到,最後轉咗去律敦治醫院ICU,點知頭3個星期因為腦積血右邊身突然半身不遂,醫生叮嚀我點艱難都要企起身,長期躺平有機會變植物人,當時我真係好驚以為自己咁樣玩完,見親邊個嚟探我都喊,話唔想以後坐輪椅唱唔到歌,所以李樂詩唔舒服,大家就吓佢;正如當日我唔舒服大家就吓我一樣。」所以o依家行動自如可以開Show,Joe哥真係好感恩,話要多謝個天,同埋多謝過往幫過佢開show嘅恩人,「o依家最重要開開心心過每一日,錢係重要,但少啲唔緊要,命裏有時終須有,命裏無時莫強求。」

其他文章
hd