首頁 日報娛樂

6位數搞保健食品生意 向海嵐歎投資比幕前有保障

15/10/2021
■Anne本月初滿47歲,好難想像奪港姐四料冠軍已是23年前。
■Anne本月初滿47歲,好難想像奪港姐四料冠軍已是23年前。 (1/6)

  向海嵐(Anne)繼年前跟友人開設珠寶首飾店後,早前再投資6位數搞保健食品生意,47歲的她本身是該品牌代言人,試用過後狀態有改善,加上疫情下更體會到幕前演出冇保障,投資可長遠發展。而Anne早前以師姐身份拍港姐真人騷,令她感觸良多,坦承港姐身份確實有無形壓力,令她未能走出框框,期待演另類角色,改變觀眾對她睇法。 撰文:杜淑霞 攝影:沈健程

髮型:Matt Chiu@Xenter 服飾:Club Monaco、Legacy Lab 場地:THE WAVE

  Anne揀保健食品投資,源於該產品邀請她做代言人,她開始試食,「代言前都會試咗先,試咗覺得好,最大效果係瞓得好咗,個人精神咗,同埋甩少咗頭髮,髮型師都覺得我把頭髮大束咗,開始介紹畀身邊朋友,介紹得多就覺得係咪應該投資,疫情下大家愈嚟愈注重健康,想早啲預防,因為健康係長遠,於是由代言變投資埋落去,唔係投資好多,六位數,基本上將我代言嗰份擺番落去,因為自己對呢樣嘢有信心。」

  今次生意Anne主力做宣傳推廣工作,所花時間不算太多,她投資多多承認跟幕前工作不穩定有關,「做藝人有個知名度,對做生意有少少幫助,人哋會信任我哋多啲,當然前題品質要好,之前珠寶到而家保健食品,覺得OK先至介紹畀人,始終做生意係比較長遠啲,做藝人演藝工作真係幾被動,唔係話你有個planning就做到,要好多方面配合,但生意你肯勤力、肯付出,係會見到個成果,自己控制到。」

  Anne早前拍港姐真人騷,令她回憶很多當年片段,但亦覺得這個身份有一定壓力,「係一個無形壓力,令到自己返到香港,即刻上番身咁。」正因這個身份,亦令她演出角色難有突破,「相信好多搵我拍戲嘅人,都定形咗我以前個框框,搵我演大家閨秀、娘娘、斯文嗰啲,但我好想做啲好另類嘢,好唔係自己,而家我係可以豁出去。」她強調不介意扮醜、素顏、增肥減磅、甚至做人阿媽都冇問題,「真係再拍要睇吓角色有冇發揮,唔係要好感,但起碼人哋會記得,唔想拍完係無聲無色,最想去挑戰精神分裂角色。」

其他文章
hd