首頁 日報娛樂

仔女勸唔好做 節目唔可以教壞細路 曾志偉誓將TVB山頭 夾埋變堡壘

22/10/2021
行政人員
■曾志偉本身諗住主攻節目創作,點知卻變身行政人員,成日要去開會。
行政人員 ■曾志偉本身諗住主攻節目創作,點知卻變身行政人員,成日要去開會。(1/10)

        68歲的曾志偉在TVB短短8個月由副總理升至總經理,掌管晒所有節目內容,絕對是TVB史無前例升得最快的總經理。曾生坦言呢份工較想像中更加辛苦,但就愈戰愈勇,除咗希望做好節目令到無線呢隻巨輪順利向前航行外,他還有個特別任務,就係攻破TVB由來已久的「山頭主義」文化,曾總經理好有信心地說:「我準備將咁多個山頭變成一個大堡壘,希望將TVB全民皆兵,齊心事成。我喺呢個行業做開和事老,應該冇問題。」

升得快的曾志偉謙稱自己唔係叻,而係團隊嘅功勞,強調一個人做唔到咁多嘢:「其實我哋試咗好多節目,由收視反映到觀眾對節目嘅喜好,《聲夢傳奇》、《日日媽媽聲》、《好聲好戲》係受歡迎,但好似《盛舞者》、《死因有可疑》冇咁多人鍾意,但唔係做錯咗,只不過擺唔啱時段同埋平台,應該將啲專題性節目放喺J2度,以前我認識TVB只有翡翠、明珠雙輝映,o依家由81至85頻道,加埋myTV SUPER、OTT等,將唔同嘢畀唔同嘅觀眾睇,收視自然較以前流失,但觀眾係冇少到嘅,只係去咗唔同嘅平台收睇。」

重點培訓高學歷年輕人

  對於變身電視台高層,曾生提到最大挫敗感係時間太少,工作太多,每日要同時間競賽,而且電視台流失太多人才,入行嘅人又唔多,要花好多時間重新培育人才:「所以返到嚟要發起全民皆兵運動,由所有創作人員提供三個節目題材,圍繞住香港及TVB需要乜節目、又有乜節目係最想做,最後喺80幾個節目動議度揀咗三個,除咗之前製作嘅『九大綜藝』外,原來年輕觀眾都鍾意睇打麻將節目,所以嗱嗱聲製作《麻將三缺一》,由藝人打廣東牌。」曾生又說目前製作節目有三大宗旨,「娛樂性、正能量及正面訊息,因為我哋係免費平台,提供正確資訊好重要,而且要持平;製作啲正能量節目令觀眾睇得興奮,又唔會教壞細路,朝住呢個目標製作節目就做乜都得。」另方面,又會好似新加坡政府咁,培訓一啲高學歷年輕人,從中再發掘寶藏。」

仔女追問幾時肯享清福

  除咗瞓覺,曾生坦言日日做到冇停手,亦試過做到病,所以仔女一日同佢講足10幾次,好肉赤咁追問他幾時先肯享福,為乜做得咁辛苦?曾生笑說:「人最緊要交代自己,返嚟目的係為乜,我係想TVB隻巨輪一路向前行,行得舒服同順利啲,做到嘅話就係我上岸嘅時候。」當問到有否合適接班人?他坦言搞行政的未搵到,但創作上有C君同王祖藍:「當日方逸華都係由歌星做到變老闆。」除此之外,志偉坦言另一個任務係攻破TVB嘅山頭主義:「我希望TVB團結成為一家人,我Day 1返嚟就做緊呢件事,o依家情況絕對有好轉,其實唔難搞,大家嚟6樓餐廳搵我傾吓偈,我會親自沖茶請佢哋食件餅,慢慢會溝通到。o依家電視行業係時候打吓仗,咁樣團隊會更加有士氣。」

  最後記者追問志偉o依家最想做乜?他諗咗陣說:「盡快搞得掂佢可以功成身退。」雖然他不設時間表,唔想將自己push得咁緊,但希望一年內完成,更指自己目前愈戰愈勇。

採訪:方騫平 攝影:葉君海、譚壹致

其他文章
hd