首頁 日報娛樂

力追一年富豪曝光 李佳芯酒店密會蟲草大王

09/11/2021
急急腳行
■一出電梯,Ali即加速行去門口,Mark緊隨女方。
急急腳行 ■一出電梯,Ali即加速行去門口,Mark緊隨女方。

  38歲的TVB「視后」李佳芯(Ali),去年跟拍拖7年的陳炳銓分手,高質中女完全唔愁,今年5月,有傳Ali獲「城中筍盤」力追,呢位從商嘅富豪傳聞去年借開聖誕Party追女,於豪宅花園放人造雪扮喺日本o氹Ali。傳聞中的「飄雪富豪」終於曝光,原來係仍志集團創辦人、御藥堂前主席,目前係寵物藥妝老闆,有蟲草大王稱號的陳恩德(Mark)。10月21日下午,李佳芯及Mark現身ICC的麗思卡爾頓酒店,致電畀雙方,阿Mark表示當日只係傾公事,絕對唔係拍拖,但又笑言:「我都想呀。」Ali亦以短訊回覆「洽談微電影合約問題」,再問有冇發展空間?Ali秒答,「不會了」,睇嚟阿Mark要畀啲力嘞。

採訪:張詠森、梁志明

  當日中午12點,報料者指李佳芯跟一名中年男現身麗思卡爾頓酒店,記者到達後未有發現,至下午2點,拎住兩個紙袋的陳恩德及李佳芯從電梯步出,女方 一出Lift即加快腳步行去門口,男方緊隨但都相隔數個身位,Mark好有風度,安排Ali登上七人車後自己先上車。

讚Ali係一個好好嘅人

  就此事記者聯絡Mark及Ali,問前者跟女方是否拖友關係?男方即否認,「梗係唔係啦,食晏傾嘢之嘛。」問到去年聖誕租人造雪機o氹Ali係咪佢?Mark嗯咗幾秒就咁答:「我哋傾啲合作嘅嘢多。」再問兩人係咪拍拖,Mark連講5次唔係,然後忍唔住笑,「我都想呀,你安排吓吖。」再連講兩次「講笑啫。」更補充,「千祈唔好咁樣害人,我年紀大,唔啱佢。」再追問對Ali的感覺,Mark答得肯定,「一個好好嘅人。」又透露他跟Ali識咗兩年,經朋友介紹認識,再強調「我哋唔係成日見,唔好亂猜。」最後問到兩人飯局傾談甚麼工作?Mark即表示留返Ali自己講,只透露屬於慈善性質嘅嘢。據知Mark投資了一套微電影,導演及女主角由Ali擔任,就此事問Mark,他靜默數秒說,「無可奉告。」

傾談微電影合約問題

  記者再以短訊聯絡Ali,問到10月21日影到佢跟Mark現身酒店,兩人是否情侶關係?Ali回覆,「那天是洽談關於腦退化微電影合約問題,不會是拖友啦。」再問跟Mark有冇發展空間?Ali覆得極快,「不會了,謝謝。」月前,Ali有回應過被富豪力追一事,強調:「首先我唔知認識中嘅朋友係咪有錢,因為我識人唔係睇佢有冇錢,對我嚟講所有都係朋友,我亦表明暫時冇準備拍拖。」

陳恩德人生大起大落

  曾掌管保健品品牌「御藥堂」18年的陳恩德(Mark),人生非常大上大落,年輕時靠炒賣股票、玩期指,坐擁千萬身家,97年一場金融風暴,令他一鋪清袋,還欠下過百萬「街數」破產收場。2002年,與家人投資數十萬創立「御藥堂」賣板藍根和蟲草東山再起。2013年10月於創業板上市,2015年11月轉到主板,最高峰時市值達到50億。「藥箱都變首飾箱」嘅洗腦廣告都係佢諗出嚟。19年太太病逝,去年離開「御藥堂」全力發展寵物保健食品及用品市場,運用自己多年來在保健產品市場的經驗,以他最熟行的蟲草產品打頭陣,短短一年「寵物藥妝」已迅速擴展至全港超過130間屈臣氏分店設立專區。

其他文章
hd