首頁 日報娛樂

兩年冇返大馬見西刀魚蛋爆喊 廖子妤被林家棟掟落地險爆頭

19/11/2021
■Fish喺《智齒》飾演斷掌毒品拆家,拍戲全程戴住隻假手。
■Fish喺《智齒》飾演斷掌毒品拆家,拍戲全程戴住隻假手。 (1/7)

  廖子妤(Fish)由馬來西亞來港發展近十年,演出嘅角色好多元化,最新在《智齒》中飾演斷掌嘅毒品拆家「可樂」。電影於17年已煞科,但Fish仲好記得拍攝過程,因為真係好辛苦,講到「可樂」,Fish表示絕對係佢從影以來最多動作戲的角色。

採訪:秦詠姿 攝影:譚壹致 服裝:Louis Vuitton

髮型:ZapTang@ Toni & Guy 化妝:King Yip @KingsMakeup

  因為好恨拍到鄭保瑞導演的電影,Fish呃導演有做開運動,之後臨急抱佛腳練體能,所以拍得好辛苦。另外,她跟影帝林家棟最多對手戲,有場戲要俾男方掟落地,綵排時好順利,但最後竟然發生意外:「我有少少走錯位,家棟哥捉我個位唔同咗,掟唔中張墊,我個頭就撞向地板,好暈,我即刻捉住呢種好驚嘅感覺,導演話OK。家棟哥好緊張捉住我問『有冇事』,佢同我講『你做得好好』,我即刻覺得個人好滾,好熱血。」

  《智齒》於香港多個舊區取景,廖子妤都話場景令佢好入戲。在香港生活近十年,Fish已拎香港身份證,坦言覺得香港反差好大:「由中環去深水埗其實好近,但已經唔同面貌,呢個反差喺咁細嘅地方都可以並存,係香港令我着迷嘅地方。」Fish細個睇港劇以為香港啲屋好大,嚟到香港先發現,唔係人人住大屋,「我都覺得住得好窄,個人好唔舒服,人係需要空間,而呢樣嘢喺香港就係最貴。」

  疫情持續近兩年,Fish收入大受影響,最近先多番啲工作:「好慌,之前仲使緊2017年賺嘅錢,又要租屋、養貓、畀錢家人,好大壓力。」不過最慘係兩年冇返馬來西亞:「好掛住,思鄉嘅情緒呢兩年達到高峰,個感覺好差,差到有日我去超市喺個雪櫃面前見到個包裝寫『馬來西亞西刀魚蛋』,跟住我就爆喊。」雖然好想返馬來西亞,但來回都要隔離,會少咗時間搵錢,所以唯有希望疫情快啲完。

其他文章
hd