首頁 日報娛樂

自小瘋狂迷上《捉鬼敢死隊》 旨呈無憾製微電影向經典致敬

19/11/2021
■旨呈這身造型及裝備,全部在外地訂購空運抵港,仿真度相當高。
■旨呈這身造型及裝備,全部在外地訂購空運抵港,仿真度相當高。 (1/6)

  搞開音樂的旨呈(鄺旨呈),最近親自製作微電影《香港版Ghostbusters想戰鬥即戰鬥》向電影《捉鬼敢死隊》致敬,齋到美國訂造道具裝備已經要5位數,但他認為是自肥計劃,因他自小已是該片超級粉絲,趁住真正延續篇、正規第三集《捉鬼敢死隊:魅來世界》 上映前,跟電影合作創作微電影,他直言已覺無憾。 撰文:杜淑霞 攝影:葉君海 場地:Second Draft

  旨呈回憶小時候第一次睇《捉鬼敢死隊》時已好有驚喜,「嗰時屋企人租帶畀我睇,第一次睇我發晒青光『正喎有鬼』。細個買齊晒裝備咁滯,因為嗰時屋企人生意漸入軌道,有啲積蓄,買晒槍、背囊、人形公仔,連間消防局玩具屋都有。」

  當知道可以跟真正的電影合作,令旨呈這個超級粉絲勁興奮,「嗰時每晚睇都諗可以係《捉鬼敢死隊》去捉鬼就好,今次唔係自己發燒做完post段片出嚟,係真真正正同佢哋合作,我覺得好開心,今次將所有嘢都一比一做,連埋個CG效果都真實咁呈現,真係有種死而無憾。喺呢行咁耐,去到呢刻你執行嘅計劃獲得人認同,畀你發揮,係人哋對你肯定,亦係對自己一個肯定,我嗰刻係有種想喊嘅感覺。」

  旨呈花咗不足一個月製作這微電影,由劇本創作、導演、主角及後期剪接全部一腳踢包辦,「除咗做音樂之外,我最鍾意就係影片製作,因為《捉鬼敢死隊》係八、九十年代產物,新世代未必記得頭嗰兩集,希望唔識嘅都會睇到津津入味。」最開心是電影公司給他自由發揮,仲可以狂買恨了很耐的道具裝備,「呢件事係超級自肥,呢套裝備如果唔係有呢個計劃係唔會出現,好似呢個質子背囊仿製品,我為咗呢條片喺美國搵咗個做得好靚嘅人,即刻用咗兩個禮拜趕工空運嚟香港,睇到有燈光,亦都有聲效,仲可以發射,淨係呢個背囊都要五位數字。」

其他文章
hd