首頁 日報娛樂

首做男一係咁露肉益「神徒」 AL自評扮女人「好醜樣」

19/11/2021
■AL認為有機會拍電影是夢寐以求的事,「第一個反應係有得入戲院,但人哋嚟睇我咁得意!入行做MIRROR時冇諗過自己可以拍到電影,呢個係每個藝人夢寐以求可以嘗試嘅嘢,係好難得經驗。」
■AL認為有機會拍電影是夢寐以求的事,「第一個反應係有得入戲院,但人哋嚟睇我咁得意!入行做MIRROR時冇諗過自己可以拍到電影,呢個係每個藝人夢寐以求可以嘗試嘅嘢,係好難得經驗。」(1/10)

        Anson Lo(AL)在首部電影《假冒女團》中有突破性新嘗試,除有不少動作場面,更要男扮女裝,拍檔Heidi(李靜儀)和Alina(李炘頤)對AL的女裝扮相有高度評價,反而當事人就唔多接受。另外,兩女角講到AL有更衣室換衫戲,肯定有露肉鏡頭,絕對是「神徒」福利位,AL聽完扭晒計:「你哋講到好似真係見過晒我全相咁!」「神徒」們,睇到全相兩字,係咪即刻心心眼先!

《假冒》是Alina的處女作,她坦言拍攝前好緊張,「收到call會有『講笑嘛』呢個感覺,永遠覺得自己未準備好。身邊人包括隊友畀咗好大強心針我,令到我個恐懼症盡量少發作。」第一次拍戲便擔正男一,AL直言唔敢挑戰新人獎,o氹到觀眾開心最緊要,「我最大亦係唯一期望,係大家睇完套戲好開心,會同我哋一齊喺戲院裏面笑。」另外,AL都想畀大家睇到佢更多可能性,對於挑戰電影新人獎?AL坦言:「實在太遙遠,邊有資格,都好難㗎!大家鍾意套戲,入場睇我已經好開心,有冇獎完全唔係重點。」

一世難得經驗

AL覺得人生第一次最特別是可以扮女仔,「人生裏面都未試過着咁多女仔嘅造型,有時形象師都會借啲女裝但係oversize嘅衫畀我哋MIRROR着,但真正着一條裙、高踭鞋,呢一世都未試過,一世可能得一次嘅經驗。」問到自評女裝扮相,AL就跟角色「雷紫荊」一樣,極難接受,「零分呀!哈哈!呢個係好醜樣嘅女人,我呢個男扮女裝唔係sell靚,係sell勇敢唔驚畀人笑。」

不過Heidi和Alina似乎相當受落AL扮女裝,Heidi更指,「我畀90分啦!佢入面有個造型好正,我哋女仔都未必敢着嘅裙,佢都選擇着,再加埋個裝同髮型,我覺得佢啲fans都會鍾意,因為係從來唔會見過佢呢一面,係十分搞笑。」AL就補充:「係個好性感嘅女性造型,(露腹肌?)唔關腹肌事嘅。」至於Alina就畀足100分,因勝在夠自然,「你唔會覺得佢特別核突,好自然。」

拍檔大飽眼福

講到難忘劇情,Heidi先透露有場跟AL在更衣室的戲份,AL直言:「更衣室梗係我想更衣啦!」Heidi再爆自己裝到啲嘢,「AL好驚畀人知,上前捉住我,但好搞笑,拍時佢好緊張,跟住我嗌話好痛呀!佢以為我做緊反應,演緊戲。」AL即自首,「因為我太大力,嗰吓我真係好着急。」

至於Alina的深刻戲份亦一樣關AL事,「嗰場我發現佢原來係男仔嚟,幾得意幾好玩。」Heidi插嘴,「都大飽眼福㗎!」問到是否勁過更衣室嗰場?AL即扭計投訴:「你哋講到好似真係見過晒我全相咁!」Alina補充:「我哋做演員要有少少幻想,但係睇到上半身嘅。」而AL最深刻是尾場的大型跳舞比賽,「嗰個係好女團feel嘅舞,同埋都拍咗好耐,因為要就唔同鏡頭同角度,有種迷你演唱會形式,有啲似拍MV,幾有型。」

形象:PIPA Creative(AL) 髮型:Denny Ku@CHIC private i(AL)、Calvin

Tsoi@HAiR(Heidi)、@Terrence_chann(Alina)

化妝:Rainbow Chung@Annie G.Chan makeup centre(AL)、Kayte Fung(Heidi)、

Make up:@Cyruslee1018(Alina)

服裝:Stella McCartney(AL)、@balmain@alexandermcqueen@balenciaga(Alina)



撰文:杜杜 攝影:葉君海、沈健程

其他文章
hd