首頁 日報娛樂

直擊《青春本我》煞科戲現場 姚焯菲鍾柔美攰到瞓 炎明熹Keep住笑堅捱得

25/11/2021
笑住打氣
■當日Gigi邊跳舞邊笑笑口為自己加油。
笑住打氣 ■當日Gigi邊跳舞邊笑笑口為自己加油。(1/12)

        炎明熹(Gigi)日前抱病出席event時,喺台上腳軟跌倒爆喊,事後解釋因為感冒未清,加上之前一晚瞓得唔好,而非休息時間唔夠。由《聲夢傳奇》入行短短4個月嘅Gigi好受廣告客戶及「Gi炎粉」(fans暱稱)歡迎,面對海量工作已變身「小鐵人」。之前Gigi拍攝新劇《青春本我》煞科戲,由朝早5點開工,再趕場直踩去演出,拍劇鏡頭以外不時笑笑口,人仔細細經已相當專業,好捱得!採訪:方騫平 攝影:張詠森

        《聲夢傳奇》學員炎明熹及姚焯菲(Chantel)人氣爆燈],由佢哋主演嘅青春校園劇《青春本我》亦食住個勢,趕喺12月5日(周日)晚八點半啟播,TVB相當重視呢個劇,加入咗重量級藝人錢嘉樂和湯盈盈、陳煒、姜皓文等客串助陣。對炎明熹嚟講11月嘅時間表真係好緊逼,因為學校喺11月9日開始考試,同時間要為劇集埋尾,兼且要出席商演、為新歌造勢及做台慶……真係少啲耐力都唔得。

鍾柔美姚焯菲要「快叉」

  本報記者之前深入校園外景場地,採訪炎明熹拍《青春本我》煞科戲,直擊呢位「小鐵人」耐力有幾犀利。當日所有飾演學生哥嘅演員要喺大禮堂大合跳,劇情講一班考緊試嘅學生哥「靈魂出竅」飛咗去舞會派對,齊齊狂歌熱舞。由於要爭取拍攝時間,提早到朝早五點開工,個個凌晨兩、三點就要起身做準備。當日人多手腳亂,跳舞鏡頭又要講求合拍性,同埋要拍唔同角度,見演員不停重覆,喺座位度起身然後再跳舞,足足拍咗幾粒鐘,真係拍得超辛苦,演員都拍到有啲攰,尤其14歲鍾柔美(Yumi)係睡寶寶,打燈期間坐着「中」眼瞓,最後瞓到伏喺枱面;至於姚焯菲就撓住雙手閉目小睡嚟個「快叉」。反觀Gigi精力充沛,仲坐到筆直留心等嗌Roll機,見她每跳完一次就呼出一口氣嚟鬆一鬆,然後整理好頭髮及衣服準備拍下個鏡頭,再攝時間猛練舞姿,而且全程都係笑笑口,好有行動力,見她拍咗幾小時都冇打過一個「喊路」,之後仲要趕場去表演,16歲女經已堅捱得,而且表現得好專業!

盡量休息Keep好精神

  被讚表現專業,帶點童真嘅Gigi就話:「我都唔知點解會笑,我成日傻笑,可以唔使理我!不過我會盡量休息Keep好個精神,因為表演真係好重要,我好少跳舞,對我嚟講係有難度,要自己練得好熟,唔想做得太差。」不過,對她來說最難反而邊拍劇邊考試,她偷笑說:「好驚溫咗書變咗唔記得晒啲劇本,唔想劇本有甩漏搞到嘥大家時間,咁應該背邊樣先,點算好呢?通常要返到屋企先開始溫書,盡量分配好啲時間囉。」至於Chantel都力讚Gigi係個好堅強嘅人,唔會顯露好攰,好專業,而她會食糖嚟提神;Yumi就話會趁轉景嘅時候盡量搵位休息養吓神。

其他文章
hd