首頁 日報娛樂

COLLAR出道歌本由CK寫 經理人Wing爆Win Win拒入女團

22/01/2022
■Wing去年7月入職負責搞女團,她承認心情似坐過山車好有壓力。
■Wing去年7月入職負責搞女團,她承認心情似坐過山車好有壓力。

話題性十足的女團COLLAR,上周三(12日)正式出道,大受歡迎的同時,亦引發不少是非和爭議,《頭條》搵來經理人Wing(戴穎)親自解畫,除了澄清COLLAR冇時間準備趕出道之說,以及組團時遇到各種困難,又大爆《全民造星IV》總決賽第5名的Win Win(楊安妮)同第9名CK(黃斯琪)冇入COLLAR原因,Wing更透露COLLAR出道團歌原本由CK負責寫。
採訪:杜杜 攝影:沈健程、張詠森

COLLAR未成軍前,花姐早已講過曾夢見公司有隊8人女團好紅,Wing承認管理層亦向這方向搵成員,「後期我覺得8個成員其中一個好處係唔需要有一個特別嘅C位,冇人係需要充當呢個壓力嘅C位,同埋4個4個雙數亦平衡啲,至於隊形有啲老師話單數好睇,但o依家發展出好多隊形,亦有其他方法可以令佢哋睇上去更加好。」
再搵合作機會
至於揀成員,Wing坦言當中有好多考量,不過大家最好奇一直深得導師和評判讚賞、總決賽得第5名的Win Win最終不入團,Wing就爆其實是Win Win自己拒絕,「佢唔係好想入,我當刻已經打晒電話問『不如你考慮吓』,但我哋尊重每個人決定,我哋唔想逼佢一定要入。」Wing對佢冇入團也覺可惜,「其實我哋好鍾意佢,佢表演絕對有能力,但佢有佢嘅決定我哋亦都尊重,但第二方面仲可以有好多合作,我同Win Win講將來仲有好多嘢可以一齊玩,唔一定女團先至可以發展。」
而總決賽當晚獲評判謝安琪大讚,最終得到第9名的CK冇加入,Wing就解釋CK有在名單當中,「佢名次好好,但係我會諗合作模式,覺得佢更適合Solo,佢有佢強烈嘅風格,亦都好有才能,又識作曲,其實我哋一開始未搵到第一首團歌時,即刻問CK不如幫女團作歌,想第一首歌佢寫團員更加有歸屬感,亦希望同多啲香港音樂人一齊行,但嗰時佢準備緊決賽,首歌未搞掂佢只畀咗啲音樂底我,首歌絕對可以發展,但係timing問題趕住要出夾唔到。不過CK咁有個性同才能嘅人,佢應該一路作曲做唱作人,寧願女團feat.CK,件作品會更加有意義,雖然佢入團可以幫我作歌,但係我又唔會首首都用佢曲風,佢做自己歌對佢着數啲。」
團員賣身10年
芯駖入團惹起不少爭議,但她大讚公司同Wing夠勇敢簽她,Wing坦承是芯駖給她勇氣,「佢嘅出現同表現好說服到我,點解要set死自己18至25歲先識做,佢都咁勇敢跨出呢步,我仲後生過佢點解我唔可以畀佢更加勇敢。」
對於成軍半個月便出道,3月更舉行首個騷,外界認為應該畀團員更多時間準備,Wing就認為由1月開始安排1年工作,完整性會更強,加上剛完比賽團員仍在狀態,「趁佢哋狀態喺度嘅時候快啲推出,未ready有未ready嘅做法,等佢哋有空間進步或者磨合相處,要透過呢啲嘢逼出嚟,我成日同佢哋講,我哋結咗婚o依家慢慢談情。」不過她承認需要更多時間跟團員相處,展望未來要在這方面下苦功,「我都了解到佢哋嘅擔心,佢哋中間其實有覺得未ready,其實大家係咪好熟又唔算,大家要一齊行落去未來10年嘅路,嚟緊演唱會仲有啲大騷,佢哋心理上亦有好多擔心同埋冇安全感,好期望同佢哋建立返呢part,其實就係愛,令佢哋更加有歸屬感,對自己隊友有信心。」
對於外界批評聲音,Wing強調會認真聆聽,「我之後都有檢討,睇咗好多留言,大家都咁講就事出必有因,我哋認為都OK嘅嘢,原來大家唔buy,我哋就會驚,我哋真係每行一步都要睇住。」講到再組女團COLLAR,Wing強調絕無此事,但覺好搞笑,「唔知點解會走咗呢個名出嚟,真係冇,組團所花費嘅人力物力太多。」但承認揀人時確有睇埋其他參賽者發展,「所以公司最後簽咗幾位女仔,加入ViuTV做藝人,佢哋未必唱跳最適合,但可以拍其他嘢。」而COLLAR出道安排引起MIRROR粉絲不滿厚此薄彼,更令花姐被鬧,Wing都覺得好無奈,「唔好鬧花姐,佢係無辜,COLLAR出道係件開心事,但係令佢受到抨擊,我都好慚愧,希望件事快啲過。」■外界負評,令Wing好擔心新歌《Call My Name!》反應。

■外界負評,令Wing好擔心新歌《Call My Name!》反應。
■Win Win在《造星IV》總決賽得到第5名。
■Win Win在《造星IV》總決賽得到第5名。
■能寫能唱能跳的CK,Wing認為她更適合個人發展。
■能寫能唱能跳的CK,Wing認為她更適合個人發展。
■Wing強調冇再出女團打算,但《造星IV》參賽者如Yoyo(葛綽瑤)已簽約做藝人。
■Wing強調冇再出女團打算,但《造星IV》參賽者如Yoyo(葛綽瑤)已簽約做藝人。
■概念照拍攝角度也被指抄襲,但好快有平反聲音,所以Wing並不擔心。
■概念照拍攝角度也被指抄襲,但好快有平反聲音,所以Wing並不擔心。
■Wing對於COLLAR出道連累花姐被鬧感慚愧。
■Wing對於COLLAR出道連累花姐被鬧感慚愧。
■Wing希望未來10年跟COLLAR成員關係更密切。
■Wing希望未來10年跟COLLAR成員關係更密切。
■Wing估唔到COLLAR出道活動慘變「時裝災難」。
■Wing估唔到COLLAR出道活動慘變「時裝災難」。

其他文章
hd