首頁 日報娛樂

提偶像少女心大爆發 張沅薇復出恨跟姜濤合作

24/01/2022
■Amy自爆幾年前一度暴肥到130幾磅,靠戒食澱粉質同睇片跟Coffee做瑜伽減掉10多磅。
■Amy自爆幾年前一度暴肥到130幾磅,靠戒食澱粉質同睇片跟Coffee做瑜伽減掉10多磅。

49歲的張沅薇(Amy),90年代主持兒童節目《閃電傳真機》,在短劇中扮演「吱吱鼠」令為人熟識。息影20多年專心照顧兩個仔的她,早前為《童你一起長大了》做嘉賓,獲讚凍齡有術,最近更宣佈復出。自爆是「姜糖」的Amy,提到姜濤即少女心大爆發,未來她除了想嘗試做KOL,最想跟偶像合作演母子。
採訪:杜杜 攝影:沈健程

15歲便被發掘當模特兒的Amy,加入TVB除主持兒童節目,還有《翡翠音樂幹線》及拍劇。97年Amy決定離巢,可惜發展未如理想,剛巧跟音樂人王雙駿相戀並懷孕,決定專心湊仔淡出幕前,現在兒子分別22歲和15歲。問到兩子點睇明星媽咪,Amy說:「佢哋知道我做過電視唔係好紅,好紅就繼續做啦!我同佢哋講,要唔做先生到你哋。」之後一直做文職的她,幾年前跟圈外人結婚,丈夫和一對兒子都好支持她復出,「佢哋覺得只要我鍾意就得。」
大仔唔抵得姜濤

Amy早前拍《童你一起長大了》見到一班舊同事好開心,卻未慣面對鏡頭,「對鏡頭梗係NG,好生硬囉!唔好意思阻佢哋收工,但無計啦!」她透露節目出街後,即有人邀復出,「啲朋友都叫我出返嚟做,話我仲見得吓人喎!哈哈!我又唔信佢哋,但後尾真係有啲人搵,咪諗一諗囉!不過再簽電視台就未必,譬如做KOL講吓護膚養顏煮嘢食,教吓人哋化妝,雖然我唔係好叻,但都有啲經驗同心得同大家傾。」

近年Amy有留意MIRROR令娛圈更有活力,仲自爆是「姜糖」,提到偶像她即超級興奮,「姜濤同我大仔同年,好有親切感,要支持特別乖嘅年輕人,我係姜糖嚟,但唔敢去追星,有Friend追,但我驚畀人笑,不過我會日日聽佢啲歌,每日都睇好多次MV,幫佢點擊。(叱咤有投票?)呢個係基本fans要做嘅嘢,我係一個盡責嘅媽咪嚟,哈哈!」原來大仔都知她是「姜糖」,「佢梗係唔抵得啦!同佢同年,又靚仔過佢。(想合作?)做路人甲乙都得。(姜濤做你個仔都似樣。)真係㗎!今晚瞓唔着,諗吓都好,一講呢啲對眼發咗光。」■跟Amy同期主持《閃電傳真機》有譚玉瑛、黃智賢、朱茵、麥包及駱俊文 。

■跟Amy同期主持《閃電傳真機》有譚玉瑛、黃智賢、朱茵、麥包及駱俊文 。
■Amy離開TVB後,曾跟任達華及于莉等拍內地劇《絕地蒼狼》。
■Amy離開TVB後,曾跟任達華及于莉等拍內地劇《絕地蒼狼》。
■為了專心照顧兩個兒子,Amy選擇息影多年。
■為了專心照顧兩個兒子,Amy選擇息影多年。
■Amy早前返娘家為《童你一起長大了》做嘉賓。
■Amy早前返娘家為《童你一起長大了》做嘉賓。
■Amy自去年姜濤叱咤頒獎禮得大獎,便開始留意他。
■Amy自去年姜濤叱咤頒獎禮得大獎,便開始留意他。

其他文章
hd