首頁 日報娛樂

廣告紅人狂吸金六位數 阿正獲阿爸讚叻 差啲住食飯

10/05/2022
■29歲的阿正,話唔好意思講只拍過兩次拖。
■29歲的阿正,話唔好意思講只拍過兩次拖。

29歲,商台叱咤903 DJ阿正(黃正宜),自20年拍《膠戰》殺入電視圈迅即爆紅,廣告接唔停,最近同時主持兩個電視節目,包括唔執屋嘅佢拍住Jeremy主持一個關於執屋嘅節目《GO!執!事務所》及《MM730》。入行5年,阿正承認《膠戰》令她賺多咗,可畀多啲家用阿媽,但未能靠此成功脫單,她自爆相士贈言31歲會有真正桃花,目前專心工作,提到近年事業唔錯獲阿爸讚好,阿正難得展現感性一面,「差啲忍唔住喊。」 採訪:杜杜 服裝:美華氏 場地:The AIR(The ONE)

阿正表示能拍《膠戰》,全靠現職ViuTV的商台舊同事向監製引薦,連試鏡都冇就直接拍攝。她承認節目帶給她好多意外收穫,首先最驚喜是幫到電台節目,「好多人話睇咗《膠戰》覺得我個人好癲,想聽返我嘅節目,又有人話為咗我訂咗商台個重溫plan,係好神奇同好感恩。」爆紅後粉絲落力支持,她覺得好神奇,「呢班人超級偏門,哈哈!幾鍾意你先會整應援,我哋可能素未謀面,都可以鍾意到咁,好多謝!」
揀對象唔會揀Jeffrey

21歲才初戀的阿正,之後只拍過一次拖,她承認恨脫單,無奈入行後更難認識異性,「風水師父算到我起碼要31歲先有桃花,呢兩年可以專心工作。」要阿正在《膠戰》4子中揀一個做對象,她首先淘汰Jeffrey,「真心問過自己一萬次,Jeffrey係一定唔會揀,太細路仔嘞!如果24小時咁照顧佢,我應該搞唔掂。我會揀珈其,我鍾意啲搞笑嘅,珈其有個好強嘅特質,佢真係好鍾意講嘢,Off機後keep住講啲得意嘢同大家分享,黐住呢個人,唔會覺得悶。」至於Edan都係做朋友好啲,「佢喺鏡頭前好風趣,但鏡頭後係比較理性化嘅人,有時同佢講啲八啩嘢,佢只係『哦,係呀!食咩一陣間?』,我成日話佢冇淚腺,佢唔係冷血,係對好多嘢都好冷感,不過同佢做嘢或者玩係好開心,但要佢好專心聽你講一件心事,佢未必hold到咁耐。」
多咗家用阿媽勁好餸

阿正讀書時愛聽電台節目,一直視森美和小儀為偶像,夢想可以做電台工作,甚至有機會做同事,所以當她離開了DBC,去了製作公司,夢想幻滅搞到情緒出現問題。直到有機會加入商台,就算人工不及前公司,阿正仍堅持追夢,「勁開心,但唔知點同阿爸阿媽講,係低過畢業第一份工作。」阿正當時有諗過作大啲人工,「作大啲要畀多啲家用,嗰個開心係掩蓋咗人工嘅問題,一返工拎咗個職員證跟同事講『唔好意思我去一去洗手間先』,拎咗入廁所打卡,又去咗天台打卡影相,搭小巴話商台有落勁興奮,嗰種開心同之前焦慮係兩個狀態,嗰吓乜都值。」

近期成為廣告紅人的阿正收入多咗,「冇正式統計過有冇七位數,未買到樓,但家用畀多咗阿媽,笑容都寬鬆咗,餸又愈嚟愈好,有一期我阿媽烚蕃薯烚菜同埋雞胸畀我,呢排好咗有脆肉瓜炒豬肉。有次去Hillary(劉沛蘅)屋企食飯勁好餸,我話自己日日食啲烚雞胸冇味,佢媽咪話『你個餐單好似我日日畀隻狗食』,哈哈!」阿正坦言父母好支持她入行追夢,初入商台時人工低,她曾跟家人講過若27歲未有成績就轉工,平時唔多出聲的正爸卻話:「點解要27歲就放棄,鍾意就應該堅持落去。」當時食緊飯的阿正好感動,「差啲忍唔住喊,其實佢由細到大都冇乜點讚我,上次返去同佢食生日飯,佢又突然話『我冇乜講呢啲嘢,我覺得你真係好叻』,搞到我好怕醜,唔敢望佢扮聽唔到夾餸。」■阿正強調並非外貌協會會員,以往最鍾意戇直男仔。

■阿正強調並非外貌協會會員,以往最鍾意戇直男仔。
■最近阿正拍住Jeremy主持《GO!執!事務所》。
■最近阿正拍住Jeremy主持《GO!執!事務所》。
■阿正仲有同旨呈和Pony(蔡寶欣),主持周二晚《MM730》的《粉絲福利署》。
■阿正仲有同旨呈和Pony(蔡寶欣),主持周二晚《MM730》的《粉絲福利署》。
■多得正爸同正媽支持,令阿正可以做自己喜歡工作。
■多得正爸同正媽支持,令阿正可以做自己喜歡工作。
■阿正視森美和小儀為偶像,入商台有機會跟兩人合作《早霸王》,好夢幻。
■阿正視森美和小儀為偶像,入商台有機會跟兩人合作《早霸王》,好夢幻。
■阿正話Edan做拍檔和朋友一流,做男友嫌太理性。
■阿正話Edan做拍檔和朋友一流,做男友嫌太理性。
■接廣告接到手軟的阿正,扮七師父更引起熱話。
■接廣告接到手軟的阿正,扮七師父更引起熱話。
■讀中學時阿正已好鬼馬,但父母以為她只是書呆子。
■讀中學時阿正已好鬼馬,但父母以為她只是書呆子。
■阿正在Jeffrey和珈其當中,竟然會揀珈其做對象。
■阿正在Jeffrey和珈其當中,竟然會揀珈其做對象。
■阿正攞住商台工作證,即入廁所打卡。
■阿正攞住商台工作證,即入廁所打卡。
■阿正跟《膠戰》其他成員,以組合身份出席《Chill Club頒獎禮》。
■阿正跟《膠戰》其他成員,以組合身份出席《Chill Club頒獎禮》。

其他文章
hd