首頁 日報娛樂

死過翻生首開Show全院滿座 張偉文好感動 一上台爆喊

29/07/2022
感動狂喊 ■張偉文一上台見到座無虛席忍唔住喊。
感動狂喊 ■張偉文一上台見到座無虛席忍唔住喊。

今年2月,69歲「靚聲王」張偉文(Donald)確診新冠肺炎送院,幸好大步檻過!上周三(20號)晚,Donald於沙田大會堂為《友情有義演唱會》補場,亦是病瘉後首個個唱。《頭條娛樂》記者獨家直擊演出前後過程,Donald眼見成個hall都係知音,感動爆喊咗3次,完場時仲被過百鐵粉包圍「集郵」,多得fans支持令他回復精靈狀態,開心揚言要唱到上紅館。  採訪:方騫平 攝影:沈健程

張偉文留醫期間發燒唔退兼半邊肺花咗,幸好福大命大,不過,因為住院及康復期間長期「與世隔絕」導致失智症變得嚴重,試過喺老人院撼頭埋牆,5月初做網上演唱會時全程面黑,多次扭計發脾氣,要經理人方俊及助手呵完又o氹。
期待有工開心情靚晒

事隔兩個半月張偉文再開show,團隊如臨大敵,方俊照顧周到,演出前先遞上羅漢果煲鹹竹蜂開聲茶及燒味作晚餐。當晚除咗換戰衣時怪叫一、兩次外,張偉文好快變返四萬咁口,他直認期待有工作,所以心情好返好多。問到係咪每次演出都視為最後一次?他反應好快一口否定:「唔係喎!有信心會唱落去。」對張偉文出心出力嘅方俊見狀都鬆一口氣,他說:「其實我有畀補腦supplement佢食,食完係叻咗好多,之前仲搵埋周啟生、周小君及方麗盈幫佢練歌,佢o依家最開心係有得唱歌,有朋友帶佢出嚟飲吓茶,希望佢keep住
向好。」
肺部受損冇影響歌聲

不過,當張偉文一出場唱出經典歌《每當變幻時》及《舊夢不須記》時就失手爆喊,一度泣不成聲:「好多謝各位,好難得今時今日仲有你哋嚟捧場,本身有少少退縮,但有咁多人支持我,好感動,你哋好長情,只要有唱歌嘅一日我都繼續唱落去。」台下觀眾大嗌:「加油呀!」又叫他多啲開演唱會嚟慰藉心靈。此刻張偉文竟搞笑駁嘴說:「我驚再肥就郁唔到喇!」無處不在嘅黃夏蕙突然現身觀眾席,還送上打氣利是。而張偉文狀態回勇,就算肺部曾受損都冇影響歌聲,亦冇乜甩歌詞,跟兩個月前判若兩人。
姚煒未有時間探青霞

張偉文完show後仍然精神奕奕,仲好好唱口,被推住輪椅跟現場觀眾影合照嘅短短幾分鐘路上,不停輕鬆地哼歌,又做賽後檢討說:「我覺得自己做得ok,有滿足感好好啦,o依家更有信心繼續唱落去,唯一自己見到愛我嘅人會比較眼淺。」張偉文堅持唔會同觀眾分享死過翻生經歷,因為唔想
記住。

另外,表演嘉賓姚煒就話新生代歌星唱得好好,舊一代都冇得彈,所以冇打算復出唱歌,反而會有啲戲癮,但傳道使命更大。之前姚煒姐不在港,未有時間問候林青霞,她說:「佢喺香港另有居所嘅。」勝利手勢 ■朋友託何婉盈送上大利是,張偉文開心到展示勝利手勢。

勝利手勢 ■朋友託何婉盈送上大利是,張偉文開心到展示勝利手勢。
四萬咁口 ■當晚經理人方俊o氹到張偉文係咁笑。
四萬咁口 ■當晚經理人方俊o氹到張偉文係咁笑。
秘密基地 ■方俊全程喺「秘密基地」目及到實,不時透過咪嚟傳送提示。
秘密基地 ■方俊全程喺「秘密基地」目及到實,不時透過咪嚟傳送提示。
踩場抽水 ■夏蕙BB完騷後又再現身,踩場大派自己嘅Farewell Party海報。
踩場抽水 ■夏蕙BB完騷後又再現身,踩場大派自己嘅Farewell Party海報。
場面墟冚 ■完騷後,張偉文被過百鐵粉包圍要求「集郵」。
場面墟冚 ■完騷後,張偉文被過百鐵粉包圍要求「集郵」。
平安利是 ■夏蕙BB跑上台前,派平安利是畀張偉文。
平安利是 ■夏蕙BB跑上台前,派平安利是畀張偉文。
照顧周到 ■方俊陪張偉文食燒味晚餐。
照顧周到 ■方俊陪張偉文食燒味晚餐。
好多人撐 ■除司儀安德尊,嘉賓有姚煒、姜蓓莉及顏聯武。
好多人撐 ■除司儀安德尊,嘉賓有姚煒、姜蓓莉及顏聯武。
幫忙練歌 ■周啟生(後排左一)、周小君(第二排左一)、方麗盈(第二排右一)、方俊(第二排右二)演出前幫張偉文練歌。
幫忙練歌 ■周啟生(後排左一)、周小君(第二排左一)、方麗盈(第二排右一)、方俊(第二排右二)演出前幫張偉文練歌。
飲開聲茶 ■演出前,方俊先遞上羅漢果煲鹹竹蜂開聲茶予張偉文開聲。
飲開聲茶 ■演出前,方俊先遞上羅漢果煲鹹竹蜂開聲茶予張偉文開聲。

其他文章
hd