首頁 日報娛樂

大病後咳到哮喘 已安排捐身家 余慕蓮出自傳:最好瞓瞓吓走冇痛苦

12/08/2022
■余毛性格樂觀,已安排好自己身後事。
■余毛性格樂觀,已安排好自己身後事。

前年11月,85歲余慕蓮(余毛)患上罕有嘅血液炎傷害到個肺,導致肺纖維化一度危殆入住ICU,雖然執返條命仔,但健康跌晒watt,日日咳到甩肺。《頭條娛樂》記者目擊余毛姐喘晒氣狂咳3分鐘,甚至咳到眼淚鼻涕齊流,真係好陰公。她面紅紅兼喘晒氣說:「最好瞓瞓吓死咗,冇痛苦。」o依家魚毛姐做人宗旨係過一日賺一日,活在當下!採訪:方騫平

余慕蓮最近推出自傳《我是一條豆角》,不扣除成本,收益全數撥捐兒童癌病基金,余毛善心得到一呼百應,初版2,000本全被內部認購,再版2,000本都被朋友掃清,要印第3版才能推出市面公開發售。
最自豪做Model行天橋

早於2008年余毛拍第3輯《向世界出發》時經已有人打她主意出自傳,但她不為所動,直至近期因為執屋,掉走一啲舊相,朋友見到提議她出自傳,「o依家唔掉(舊相),第日死咗人地咪一樣係掉,咁朋友話出咪出囉,反正係做善事,我後生都幾靚㗎!」

自傳中滿載朋友溫情,除米雪、林建明等關愛外,仲有提及陪李香琴出埠登台,汪明荃忽發奇想建議她一齊上台玩,還提供埋啱身嘅二手戰衣,兼有專人化妝,讓余毛姐可以靚靚登場,「我好鍾意登台,舊公司成日醜化我,我唔鍾意,做到無晒癮,70歲就退休。」自傳中當然唔少得講到「大恩人」鄧達智大膽用她做model,喺大會堂行catwalk,余毛姐諗返起都好自豪:「我又唔怕嘅,當自己做緊《EYT》,喺台上開心揮手,結果贏得好多掌聲。」
張衛健匯八萬標靶藥費

重提當日昏迷送院,病情危重,住院半年幸能大步檻過。余毛毫不忌諱說:「醫生形容我同魯芬病情一樣係九死一生,o依家定期用標靶藥嚟控制住病情……」天生樂觀嘅余毛姐自爆經已安排好身後事:「我寫晒平安紙,會捐出o依家住緊,一廳兩房嘅旺角舊樓(30年前用幾十萬買落,現市值大概600萬),仲會撒灰喺紀念花園。」

余毛姐堅稱唔驚死:「日日都死咁多人驚乜?琴姐、炳哥、我隔籬屋鄰居……最重要好死,唔好有事又車返去醫院,住院嗰半年唔生唔死,食唔到、講唔到嘢,如果要瞓牀,多10年命都死得喇!o依家做一日賺一日,有牌打有戲睇就去。」余毛姐又話活到今時今日人生冇遺憾,唯一喺4年前畀「朋友」所害,以為上廣州身體檢查,原來被騙去打「回春針」拍廣告,唔排除係因為咁演變成大病,「唔係被害我可以平平安安咁,玩多幾年安享晚年,o依家唔知玩得幾多個月,不過都賺咗好多友情,朋友個個都對我好好,張衛健擔心我冇能力負擔昂貴嘅標靶藥費,身在北京匯錢畀我,我問銀行職員係咪8,000(蚊)?佢話我睇少咗個零呀,我哋唔係合作好多,但真心好感動。」■余毛接受訪問前勁咳3分鐘,咳到標晒眼水及鼻涕,面都紅埋。

■余毛接受訪問前勁咳3分鐘,咳到標晒眼水及鼻涕,面都紅埋。
■大病一場後,余毛健康跌晒watt,o依家行得唔好,體重不足90磅。
■大病一場後,余毛健康跌晒watt,o依家行得唔好,體重不足90磅。
■余慕蓮最近推出自傳《我是一條豆角》,反應熱烈。
■余慕蓮最近推出自傳《我是一條豆角》,反應熱烈。
■余毛因父母離婚唔打算結婚,早於40多年前影婚紗照留念。
■余毛因父母離婚唔打算結婚,早於40多年前影婚紗照留念。
■鄧達智邀請余毛做時裝show壓軸嘉賓。
■鄧達智邀請余毛做時裝show壓軸嘉賓。
■沙姐、羅蘭及戚美珍多年嚟都好照顧余毛。
■沙姐、羅蘭及戚美珍多年嚟都好照顧余毛。
■余慕蓮陳年泳照喺自傳中曝光。
■余慕蓮陳年泳照喺自傳中曝光。
■小時候嘅余慕蓮面尖尖,雙眼好精靈。
■小時候嘅余慕蓮面尖尖,雙眼好精靈。

其他文章
hd