首頁 日報娛樂

首奪女配角望家鄉買屋送父母 廖子妤捱足十年曾疑惑︰我係咪垃圾

15/08/2022
■Fish未敢想下次有最佳女主角提名,只望能遇到更多戲份角色。
■Fish未敢想下次有最佳女主角提名,只望能遇到更多戲份角色。

32歲廖子妤(Fish)憑電影《梅艷芳》中「梅愛芳」一角,首奪「金像獎最佳女配角」,由家鄉馬來西亞來港發展10年,一心追夢做演員的Fish,試過三年冇戲開靠做模特兒撐住,用25蚊捱足3日,曾懷疑自己唔啱做演員「我係咪垃圾、廢柴!?」但Fish冇放棄,因她只識演戲,奪獎令她肯定自己冇揀錯演員路,未來她希望一嘗主角滋味,更想在家鄉買屋,令父母安享晚年。
採訪:杜杜 攝影:朱偉彥 髮型:Zap Tang @ Toni & Guy 化妝:Melody Chiu 服裝:sportmax_hk@sportmax

Fish奪獎時相當激動,通宵慶祝後,瞓醒已是下午5點,靜心回想,最期待獎項能帶給她更多機會,「嘗試吓做主角,比較長啲嘅角色,唔係淨係幾場戲出一出,想有唔同方面嘅角色可以做到,譬如靚女囉!或者女性化啲角色、搞笑,我個人都幾搞笑。」
憑《梅艷芳》衣錦還鄉

要Fish在金像獎兩個提名《梅艷芳》和《智齒》揀至愛,她坦言兩套電影都畀足心力演出揀唔到,但她承認對《梅艷芳》會多份感情,因電影把她帶返家鄉,「馬來西亞冇人識我,因為我拍好多戲返唔到去,嗰邊上大片多,我拍開都係敏感題材或者小本製作。」上年12月,衣錦還鄉的她做訪問也特別緊張,「近鄉情怯,返到屋企唔想衰,喺香港早幾年再慘,都唔會夠膽po出嚟話冇錢,唔想衰畀家鄉嘅人睇,點衰都喺香港捱咗佢。」

難捱日子,要由2012年Fish來港發展講起,一年後有機會拍首部電影,由泰迪羅賓監製的《末日派對》,更有機會提名「金像獎最佳新演員」,可惜往後3年一直冇戲開,只靠模特兒工作支持生活,試過窮到一日食一餐,「廿蚊定廿五蚊捱咗3日,啲人完全唔信,大佬10年前喎!買公仔麵有5包㗎嘛!屋企仲有啲米,又有啲蛋,就係靠呢幾樣嘢捱過咗。」其實當時公司每周會預支400元生活費給她,之後在人工扣,只因撞正假期她未能返公司攞支票,搞到要捱餓。
被傳媒冷待最難捱

經濟壓力並非最難捱,反而是演出機會不多,知名度低被傳媒冷待,才令Fish最難受,「我拍咗一、兩部戲,但係又唔係好有機會!去到公開場合影相,都會畀人叫你『快啲走』,嗰種感覺都幾難捱,其實我唔介意唔影相,但公司想我影,記者又唔想影我,咪快啲影完走囉!做得唔好時又會諗,我係咪一個垃圾!一個廢柴!」

Fish也想過放棄夢想,「但我冇第二樣嘢識,放棄咗唔知做咩好,哈哈!做呢行好辛苦,做第二行又會唔辛苦咩?每次好辛苦好難捱時,會諗吓父母,諗吓喺呢個城巿比我更辛苦嘅人,依然好努力,咪捱吓囉!」Fish承認父母是精神支柱,所以領獎時喊着感謝雙親,但為了不想令身在家鄉的媽媽和在印尼打工的爸爸擔心,她慣了報喜不報憂,「有時都會喺IG或FB講吓,都想有人知,有人呵吓,但又唔想阿媽擔心。」

Fish坦承以往唔識感恩有對好父母,總覺得別人比自己幸福,「多謝父母提供咗一個自由環境畀我,冇限制我讀書好叻,做邊個行業,攞幾多錢返屋企,屋企唔係好富有,但唔使等我份錢開飯,要我做啲唔喜歡嘅嘢養家,以前唔覺得係乜嘢,原來我已經擁有好好嘅條件去追夢,父母令我冇後顧之憂,就算出面失敗或者跌得好痛好傷,我知道有個地方可以返去。」未來她最想好好回饋父母,「我希望將來可以喺馬來西亞買到屋,爸爸唔使喺印尼做嘢,一家人一齊,有錢畀爸爸媽媽做啲開心事,譬如去旅行,開間小店經營,盡返做女嘅責任陪多啲佢哋。」■第二度獲提名金像獎最佳女配角的Fish,終憑《梅艷芳》奪獎。

■第二度獲提名金像獎最佳女配角的Fish,終憑《梅艷芳》奪獎。
■Fish冇電影開的日子,幸吹韓風啱晒她外形,仍有模特兒工作頂住。
■Fish冇電影開的日子,幸吹韓風啱晒她外形,仍有模特兒工作頂住。
■Fish衣錦還鄉做訪問,她承認心情特別緊張。
■Fish衣錦還鄉做訪問,她承認心情特別緊張。
■Fish在電影《梅艷芳》中,飾演梅艷芳胞姐梅愛芳。
■Fish在電影《梅艷芳》中,飾演梅艷芳胞姐梅愛芳。
■今屆金像獎,Fish還憑電影《智齒》提名最佳女配角。
■今屆金像獎,Fish還憑電影《智齒》提名最佳女配角。
■在Fish的社交網,不難發現她好多時簡單食個麵當一餐。
■在Fish的社交網,不難發現她好多時簡單食個麵當一餐。
■Fish爸爸一直在印尼工作,所以她很珍惜跟對方相聚時間。
■Fish爸爸一直在印尼工作,所以她很珍惜跟對方相聚時間。
■Fish跟媽咪感情要好,疫情前每有電影上映,媽咪都來港支持。
■Fish跟媽咪感情要好,疫情前每有電影上映,媽咪都來港支持。
■2017年,Fish憑電影《骨妹》,首度提名金像獎最佳女配角。
■2017年,Fish憑電影《骨妹》,首度提名金像獎最佳女配角。
■Fish來港翌年拍電影《末日派對》,更有機會提名「金像獎最佳新演員」。
■Fish來港翌年拍電影《末日派對》,更有機會提名「金像獎最佳新演員」。
■3年冇戲拍,Fish終接拍要性感演出的電影《同班同學》。
■3年冇戲拍,Fish終接拍要性感演出的電影《同班同學》。

其他文章
hd