首頁 日報娛樂

提起《聲夢》戰友就想喊 靠友情捱過網片事件困擾姚焯菲 

06/09/2022
■Chantel謂今年暑假過得特別充實,因為除了玩還有工作。
■Chantel謂今年暑假過得特別充實,因為除了玩還有工作。


姚焯菲(Chantel)最近推出單曲《#BFF》,今次講友情令她覺得更有共鳴,特別早前受網片事件困擾的她,能順利捱過,朋友力量功不可沒。她又解釋早前在金曲頒獎禮奪獎時演唱失準,提醒她要更努力進步,最近更嘗試作曲填詞,希望未來能夠有滿意作品可以公開發表。採訪:杜杜 攝影:羅安強

新歌《#BFF》由曾出任《聲夢傳奇》客席導師的林奕匡作曲,Chantel好榮幸唱到對方作品,而「BFF」意指Best Friend Forever,以友情作主題,她亦唱得份外投入,更想透過作品答謝一直在她身邊的朋友和歌迷,「我有好多好好嘅朋友,想將呢首歌送畀佢哋,同埋我都想用嚟多謝fans,想多謝佢哋一直都陪伴住我,無論發生咩事都喺我身邊。」錄音時,她還想起一班《聲夢》戰友,提起仲眼濕濕,「佢哋真係一班好好嘅戰友,死啦想喊O添!由比賽開始一直喺身邊陪伴住,呢件事係好美好,生命入面有一班咁好嘅朋友。」
介意頒獎禮獻唱失準

重視友情的Chantel亦承認早前受網片事件困擾,亦全靠一班好朋友,令她走出低谷,「有時睇見啲負評唔開心,或者間中諗返起嗰件事唔開心,但有朋友喺我身邊,佢哋都會話冇事,你可以做到,捱過呢一關,佢哋一直都喺我身邊話唔會離開我,令我好感動。」而這件不快事,亦令她有所學習及成長,「學到凡事要小心啲,無論係交朋友或者任何事都要提高警覺。」

對於早前在金曲頒獎禮奪獎時演唱失準,Chantel仍很介意,但經一事長一智,未來會繼續提升自己實力,除了想挑戰跳唱歌外,她還趁暑假努力創作,「有屬於自己作嘅歌係非常之重要,好多歌手都係將自己情緒擺喺首歌入面,透過首歌令到更加多人有共鳴,所以我都學習緊。」她透露暫時已完成了半首歌的曲詞,但距離發表還有一段距離,「唔好攞嚟出醜,唔係作得太好,要再改善,我o依家作慢歌先,都係講自己經歷,如果真係幾好嘅話,就攞出嚟畀大家聽。」不過Chantel謂唔會畀個限期自己,但會得閒努力創作。■Chantel自知樂器不叻,但會用電腦程式學習創作。

■Chantel自知樂器不叻,但會用電腦程式學習創作。
■新歌《#BFF》講友情,Chantel覺得唱起來更有共鳴。
■新歌《#BFF》講友情,Chantel覺得唱起來更有共鳴。
■網片事件一度令Chantel不快,幸好爸爸及家人一直支持。
■網片事件一度令Chantel不快,幸好爸爸及家人一直支持。
■Chantel好想藉着新歌,答謝一直支持她的朋友及粉絲。
■Chantel好想藉着新歌,答謝一直支持她的朋友及粉絲。
■冇見Chantel一排,跟炎明熹一樣都長高了。
■冇見Chantel一排,跟炎明熹一樣都長高了。
■Chantel在金曲頒獎禮憑《原來談戀情是這麼一回事》奪金曲獎及女新人銀獎,因太緊張令演唱失準。
■Chantel在金曲頒獎禮憑《原來談戀情是這麼一回事》奪金曲獎及女新人銀獎,因太緊張令演唱失準。

其他文章
hd