首頁 日報娛樂

捲入張偉文「慘不忍睹」事件 肥媽狂呻無辜:用吓個腦啦,我點會咁話佢!

15/09/2022
■方俊從老人院接走張偉文過中秋,齊齊食月餅。
■方俊從老人院接走張偉文過中秋,齊齊食月餅。

《星島頭條》日前獨家報道有位好有「份量」,又聲大大嘅女歌手睇完張偉文(Donald)演唱會後,指他身體差,坐住輪椅仲要推佢出嚟唱歌賺錢係慘不忍睹嘅事,搞到張偉文好嬲豬。報道出街後,全城網民齊估女歌手是誰,因為一向講嘢好有中氣,肥媽成為頭號嫌疑人物。肥媽向本報承認睇張偉文演唱會期間曾經嘆氣,佢愈講愈勞氣,「我係大大聲啫,係咪?睇到喊有乜錯呢?用吓個腦啦,我點會咁話佢呀?」張偉文經理人方俊聽畢肥媽言論表現平靜:「其實肥媽入後台為張偉文打氣,做法比喊住走嚟得正面嘅。」
採訪:方騫平

69歲「靚聲王」張偉文堅持要自強不息,唔想做廢老,即使今年二月中咗新冠肺炎,康復後仍然賣命完成《友情有義演唱會》兩場補場。對於演唱會後傳出是非,他曾咬牙切齒反駁:「我剩番碗飯,碗飯對我嚟講好寶貴,我得一、兩份收入都唔放過我?」上周六中秋佳節,方俊喺老人院接咗張偉文出嚟熱熱鬧鬧過節,佢仲一口氣吞下半個月餅, 兼食到最愛的水晶梨,過咗一個快樂中秋。
心噏睇到喊半途離場

提到全城齊估聲大大女歌手,網民矛頭指向肥媽,她透過短訊接受《星島頭條》訪問時就表示好無辜:「我都冇講過,根本搵我嚟做新聞。」她又講出事件來龍去脈,原來當日她和黑妹(李麗霞)去尖沙嘴睇張偉文頭場show,一入後台就各自畀利是張偉文,然後就出台前睇show,「見佢坐住輪椅出嚟唱歌時爆喊,同埋見佢睇住個電視機,都睇唔清楚啲歌詞,我睇到咁就係咁喊,朋友話『你喊得咁緊要就行先啦。』所以我睇咗一半就行咗去喇。」肥媽表示,半場離開時聽到有人話:「真係都幾可憐,咁都仲叫佢出嚟做show!」佢聽畢就唉咗一聲及回應咗句:「係囉!」肥媽再三強調原句一定唔係出自佢把口。
有去捧場仲有畀利是

肥媽坦言覺得呢件事好心冇好報,「佢搵飯食關我乜事啫?我成日都支持佢,佢開演唱會我又做佢嘉賓,係咪呀?之前佢搬咗去內地,又係我叫佢返嚟唱老歌節目,用吓個腦啦,我點會咁話佢呀!係咪呀!係有人話佢,真係覺得佢好可憐、好陰功,但點解要拉我落水啫?我認同,但唔係我講,我真係冇講嘢喎……大家都知我為人㗎啦,我係大大聲啫,係咪?我點會話人哋乜嘢,如果我唔係對你友善,都唔會一嚟就畀利是,如果唔係錫你,都唔會一路睇一路喊,啱唔啱呀?點解話我唔畀半碗飯佢食?關我鬼事咩,佢搵飯食,我仲要去捧佢場喎。大家都係歌星,見佢咁樣喊,走先都唔得?唔係呀嘛……」
方俊力證兩人唔多熟

對於頭號嫌疑人肥媽言論,方俊直指張偉文同肥媽其實唔熟:「佢入咗老人院幾年,都冇往來及聯絡,你話熟唔熟喇?」問到肥媽有冇派利是畀張偉文?他就說:「我走來走去做嘢好忙,當時就見唔到喇。」提到肥媽為張偉文悲從中來感觸落淚,方俊覺得當日係第一場show,張偉文還未適應,而肥媽睇咗半場就走咗,「我覺得可以有好多種正面方法去表達嘅,可以入後台支持偉文,同佢打氣,我覺得咁樣仲好。」另外,肥媽再重申同黑妹有畀利是張偉文,因為欣賞佢,先畀錢佢。■肥媽成聲大大女歌手頭號嫌疑人物,佢大呻好無辜。

■肥媽成聲大大女歌手頭號嫌疑人物,佢大呻好無辜。
■張偉文曾咬牙切齒,不滿大大聲女歌手阻他搵啖飯食。
■張偉文曾咬牙切齒,不滿大大聲女歌手阻他搵啖飯食。
■就算坐輪椅唱歌,對張偉文嚟講都係一種精神寄託。
■就算坐輪椅唱歌,對張偉文嚟講都係一種精神寄託。
■甄妮亦係嫌疑人物,不過佢喺台灣打理農場,已不問世事。
■甄妮亦係嫌疑人物,不過佢喺台灣打理農場,已不問世事。
■杜麗莎一度被網民推測係聲大大女歌星。
■杜麗莎一度被網民推測係聲大大女歌星。
■張偉文去年12月舉行首場《友情有義演唱會》,當晚他爆喊多謝觀眾捧場。
■張偉文去年12月舉行首場《友情有義演唱會》,當晚他爆喊多謝觀眾捧場。
■張偉文首場個唱,肥媽及黑妹姐曾到後台探班,並畀利是支持。
■張偉文首場個唱,肥媽及黑妹姐曾到後台探班,並畀利是支持。
■張偉文喺方俊屋企食好嘢過節,睇佢幾開心。
■張偉文喺方俊屋企食好嘢過節,睇佢幾開心。
■曾確診死過翻生嘅張偉文,出院後狀態不佳,要由方俊照顧。
■曾確診死過翻生嘅張偉文,出院後狀態不佳,要由方俊照顧。
■全城齊估聲大大女歌手,網友估係肥媽。
■全城齊估聲大大女歌手,網友估係肥媽。

其他文章
hd