首頁 即時娛樂

【頭條獨家】跟陳茵媺似初戀 同仔女黐到實 陳豪親教一家五口sweet爆秘訣

15/07/2020 21:15:00
陳豪跟老婆陳茵媺仍好似初戀一樣,仔女又同他黐到實,一家五口sweet爆。
陳豪跟老婆陳茵媺仍好似初戀一樣,仔女又同他黐到實,一家五口sweet爆。

陳豪(阿Mo)最近在新劇《殺手》飾演「殺手之王Zero 」風流成性,溝高海寧又冧李佳芯,不過現實中阿Mo堪稱是廿四孝老公兼好爸爸,一家五口出名sweet到爆。早前《頭條》就影到他同老婆陳茵媺(Aimee)拍拖食雪糕,結婚7年竟然仲好有初戀feel;而他雖然好鬼忙湊仔時間唔多,但三個寶貝仔女依然同佢黐到實。究竟面對「七年之癢」仍同老婆關係保鮮,跟仔女又咁好感情呢?阿Mo呢個一家之主就自有一套維繫家人感情秘訣,首先兩公婆一定唔可以有親情冇愛情,夫妻好感情仔女自然學識點樣愛錫人;而不論同老婆定對仔女一樣離唔開肌膚之親,攬攬錫錫絕對唔少得,咁樣一家人自然日日都sweet爆啦!撰文:杜淑霞 攝影:李維隆 服裝:Harrison Wong

阿Mo自爆他和Aimee互相都不會睇對方演的咀嘴戲,更笑言是冇眼睇。
阿Mo自爆他和Aimee互相都不會睇對方演的咀嘴戲,更笑言是冇眼睇。
講到老婆Aimee和三個寶貝,阿Mo總是笑到四萬咁口。
講到老婆Aimee和三個寶貝,阿Mo總是笑到四萬咁口。




阿Mo在10年跟拍拖兩年的Aimee 結婚後,接住生了6歲的大仔梓燁(Aiden Joshua)、5歲的二仔陳浩鋒(Nathan Lucas)和4歲的細女凱婷(Camilla)。最難得結婚7年,早前阿Mo拖住Aimee去中環拍拖,仲不停如癡漢般甜望老婆食雪糕,完全是初戀Feel,提起他即狂笑,仲話因為Aimee平日要照顧三個小朋友太辛苦,「所以當我得閒,我就盡丈夫嘅責任,陪佢出街,行街shopping咁,做少少嘢令到佢開心係需要嘅,(佢食雪糕就得好易○氹!)yeah!哈哈!」

肌膚之親好緊要

之後阿Mo再教維繫家人感情的秘訣,「其實大家遺忘咗丈夫同太太係第一個關係,父母同仔女係第二個關係,大家千祈唔好屋企得爹哋媽咪同細路哥,唔係囉!坦白講夫妻感情愈好,家庭裏面愈開心,愈多愛細路仔啲性格先至愈光亮,先至會開心,我哋好深信呢個理論嘅,所以我同Aimee其實有個承諾,每年去個二人世界嘅trip,我想將我哋之間嘅愛維繫住,等屋企充滿住愛,所以我哋好注重攬攬錫錫,表達同對方嘅愛,我哋經常做,就係想啲細路學識咩叫愛。」

至於平日又要拍劇又要打理咖啡生意,阿Mo湊仔時間唔多,但三個仔女依然好黐佢,阿Mo就再教路,「小朋友黐我哋,因為我哋好黐佢哋,我哋想同佢哋一齊,佢哋先會想同我哋一齊,先會同你friend,呢啲就係愛,我哋經常bye bye前錫錫,臨走前又錫錫,變咗佢哋肢體上會多啲接觸,會走嚟坐大髀,嗰種肌膚之親都幾緊要㗎!」

阿Mo成日同Aimee攬攬錫錫,仔女亦有樣學樣。
阿Mo成日同Aimee攬攬錫錫,仔女亦有樣學樣。
阿Mo成日同Aimee攬攬錫錫,仔女亦有樣學樣。
阿Mo成日同Aimee攬攬錫錫,仔女亦有樣學樣。



囡囡入行會支持

講到《殺手》中,阿Mo不時溝女,但原來只要有咀嘴場面,Aimee就自動唔睇,「拍之前有話佢聽,但佢唔睇㗎!佢寧願唔睇,冇眼睇,哈哈!我同佢都好明白大家做演員嘅,就算佢做都好,我都會支持佢,叫佢放心去做,唔好有咩顧忌。不過調返轉我都一樣,梗係唔睇啦!(《殺手》有冇咀戲?)冇嘅,佢成套都可以睇,哈哈!」至於阿Mo的經典三級背部全裸之作《晚九朝五》,Aimee一樣未睇,「真係未喎!(晚年同佢一齊睇?)唔會啦!你咁激嘅!(同小朋友一齊睇?睇爹哋幾好身材!)哈哈!佢哋唔會啦!(有心理準備小朋友將來睇到?)其實都冇乜所謂,我哋做得幕前,預咗畀人哋分享,做演員就係咁樣,好嘅唔好嘅都放咗喺熒幕上,大家自己評定。」

由於阿Mo三個小朋友太細,暫時未睇過他的作品,不過對他工作就超好奇,「我開工有時會特登拍啲片畀佢哋睇,佢哋睇得好開心,囡囡又成日都話要跟我去片場睇我拍戲,但仲未實現佢呢個夢想。」阿Mo承認好似迷你版Aimee的囡囡將來有可能入行,「佢真係超級貪靚,佢天生㗎!媽咪化妝、整頭髮,搽唇膏、整指甲,特別鍾意,咁細個自己揀衫出街,我調返轉頭問佢意見,佢又答到我,佢taste都唔錯㗎!(步你哋後塵入行?)女大女世界,我哋做父母嘅,好好準備佢哋面對佢哋嘅將來,起碼讀好啲書有個好好基礎先,到時做咩自己再選擇,將來靠佢哋去闖,作為Daddy做咩都會支持。」

早前本報拍得阿Mo拖住Aimee去中環拍拖,仲不停如癡漢般甜望老婆食雪糕,完全是初戀Feel。
早前本報拍得阿Mo拖住Aimee去中環拍拖,仲不停如癡漢般甜望老婆食雪糕,完全是初戀Feel。
阿Mo也承認猶如Aimee迷你版的細女 Camilla超級貪靚。
阿Mo也承認猶如Aimee迷你版的細女 Camilla超級貪靚。
劇中阿Mo既溝高海寧,又冧李佳芯,相當風流。
劇中阿Mo既溝高海寧,又冧李佳芯,相當風流。
阿Mo自爆本身是武癡,10幾歲在澳洲時仲學過鐵沙掌,所以今次《殺手》中有不少動作戲反而好過癮。
阿Mo自爆本身是武癡,10幾歲在澳洲時仲學過鐵沙掌,所以今次《殺手》中有不少動作戲反而好過癮。
阿Mo坦言最初抗拒劇中大騷咖啡技術,但後來開竅覺得幫到演出就冇所謂。
阿Mo坦言最初抗拒劇中大騷咖啡技術,但後來開竅覺得幫到演出就冇所謂。
1994年阿Mo入行首部電影《晚九朝五》中,有不少情慾戲,更會背部全裸。
1994年阿Mo入行首部電影《晚九朝五》中,有不少情慾戲,更會背部全裸。
其他文章
hd