首頁 即時娛樂

【醫生已盡力】林子博太太出院報平安  董燕君:望唔好再痛

07/08/2020 11:00:00
林子博老婆上載留院時圖片,相中個人仲好精神,令人感到安慰,加油呀!
林子博老婆上載留院時圖片,相中個人仲好精神,令人感到安慰,加油呀!

林子博太太董燕君(Shirley)去年確診患上極罕有癌症「平滑肌肉瘤(腹腔)」,經半年治療,腫瘤縮少咗,病情向好,全家都陪伴Shirley積極面對抗癌之路。可是上周六(1日) Shirley病情突然告急,腫瘤劇痛,又暈又嘔且去不到廁所,甚至連下床也有困難,被送院瑪麗醫院腫瘤科病房治理,但在留院期間情況未見有太大改善,情況令人擔心。最慘因為疫情關係,子博不能探望,也無法和醫生聯絡,令他非常擔心,除咗視像時照顧太太情緒外,一對子女都不時追問媽媽幾時可以出到院,增添子博唔少壓力。

 

不過,希望在明天!留院5日後,噚日下午Shirley終於轉好出院一家團聚啦!Shirley留言感謝醫護的照顧,並坦言今次入院只可以頭痛醫頭,腳痛醫腳,對她的病沒有太大幫助,希望以後腫瘤乖乖哋,唔好再無端端咁痛啦!








 

上月一家四口曾開心出外飲茶,𠵱家最重要係爭取同家人相處時間。
上月一家四口曾開心出外飲茶,𠵱家最重要係爭取同家人相處時間。
插住針嘅手就腫到變豬手,睇見都心痛。
插住針嘅手就腫到變豬手,睇見都心痛。

入院好無助好驚
她報喜道:「我出院喇!經過了6日(正確應該係5日)終於可以出院!好感動!雖然呢次入院只係可以頭痛醫頭、腳痛醫腳!完全對我嘅病沒太大幫助!但係都好感恩遇到一班非常細心嘅專業團隊!其實現在公營機構水凖都好高,同以往差好遠,服務好似私家醫院咁!多謝你哋過去6日嘅照顧!

 

交代返我嘅病情,我係因為上星期四早上突然右肋骨內痛(應該係肝位置),之後胃痛,痛到坐唔到、企唔到(痛到成個人攣埋,我估呢啲係叫做癌痛)!之後開始暈、作嘔、氣喘!頂了兩日到咗1/8夜晚去睇急症!醫生家𠵱只係幫我用藥控制,暫時止痛、止暈!其實大部份比較強嘅止痛藥都有嗎啡成份!但係有嗎啡成份嘅嘢我食咗又會又暈又嘔!所以呢幾日就不停調教份量!其他實質嘅嘢醫生真係冇乜辦法可以做!我知道佢已經盡咗力!希望以後乖乖哋唔好再無端端咁痛啦!(我都知道好多嘢都要靠自己)不過真係好驚㗎!無助感真係好重!最後要同大家講聲唔好意思!過去幾日要你哋為我擔心!」網民送上祝福,留言打氣,為她加油,指她一定能戰勝癌魔。

留院期間服用多種藥物,尤以強力止痛嘅嗎啡水,副作用令她又暈又嘔,最慘只能產生舒緩作用,實質藥物幫助唔大。
留院期間服用多種藥物,尤以強力止痛嘅嗎啡水,副作用令她又暈又嘔,最慘只能產生舒緩作用,實質藥物幫助唔大。
因為又暈又嘔又冇胃口,喺醫院都係食清淡嘢為主。
因為又暈又嘔又冇胃口,喺醫院都係食清淡嘢為主。

其他文章
hd