首頁 即時娛樂

【頭條獨家】萬人迷橋王 Sales佬上身 姜濤爆笑自誇冇橋可搵佢

17/09/2020 23:22:00
自封「橋王」的姜B個樣勁得戚,不過亦都好可愛,引得現場工作人員猛笑。
自封「橋王」的姜B個樣勁得戚,不過亦都好可愛,引得現場工作人員猛笑。

姜濤出道以來人氣勁旺,每次有新歌推出都成為熱話,粉絲對他死心塌地,雖然有人認為他好命,但其實呢個世界又點會有莫名其妙的成功!姜B接受《頭條日報》訪問,就自爆早在未入行仍是肥仔時,已開始自度舞台上的表演方式,所以由參加《全民造星》到最近親自執導新歌《孤獨病》MV,都一直有橋用。自封「橋王」的姜B,更得戚話大家要idea可以隨時搵他,他仲Sales佬上身,「無論你高budget定低budget都可以因應狀況調整。」嘩!唱得跳得又靚仔,仲要有橋,仲邊夠你玩先姜B!撰文:杜淑霞 攝影:李維隆 髮型:Lydia Yung、Denny [email protected] Private I Salon 化妝:Giann,[email protected] Centre 服裝:D-Mop 場地:JAS Party&Studio

姜B自言不單已為未來歌曲度好橋,連演唱會的表演方式都諗埋。
姜B自言不單已為未來歌曲度好橋,連演唱會的表演方式都諗埋。
姜濤笑言以往經常唱愛情歌,「但係我又說服唔到人講愛情呢啲嘢,咁就唱一啲對得住首歌嘅題材啦!」
姜濤笑言以往經常唱愛情歌,「但係我又說服唔到人講愛情呢啲嘢,咁就唱一啲對得住首歌嘅題材啦!」




姜濤首次聽到林奕匡度身訂造的《孤獨病》,好似搵到一生中最愛,「真係好似揀女朋友咁一見鍾情,呢個冇辦法用言語去表達,係佢就佢啦!呢個係同你過世㗎啦!我都係信一見鍾情,所以當咗呢首歌係女朋友咁日日聽,好愛呀!」他更希望再度跟林奕匡合作,「我應承教佢跳舞嘛!希望佢下隻係唱跳歌,我可以幫佢度吓點跳舞,我覺得歌手係要尋求突破嘅。(花姐:你嘅突破係咩,咁勁?)唔係,希望林奕匡前輩都試吓跳唱。」




體形成最大困擾

身為獨子的姜B好明白孤單感覺,所以用作新歌主題,原來他入行後孤獨感都冇停過,「外界對你猜測、批評,自以為好了解你,甚至有時屋企人都會嚟問你,有冇做過呢件事,譬如有時唔係肥係腫,跟住屋企人嚟問我,到底你係肥定腫,我話『阿媽你養我咁多年都唔知我肥定腫咩?』(體形係最大困擾?)冇錯呀!類似呢啲好少事都會(孤單)。」不過姜濤坦承上次現場唱《蒙着嘴說愛你》失準被指咬字不清更嚴重,「咁我正職係歌手嘛!(肥)呢啲純粹係一啲表面嘅嘢,歌手就係以唱歌搵食,當你連自己搵食嘅嘢都未做好,係應該幾丟架嘅一件事,所以聽到呢啲批評冇辦法,唯有接受囉!」講到事件最大得着,姜B竟然仲識得講笑,「得着係以後唔好揀咁高音嘅歌唱,高音都差唔多啦!《蒙着嘴》嘅高音現階段已經係極限,如果大家想聽高音可以搵阿Jer(隊友)。」但姜B有努力改進,現在每日跑步都會唱一次自己4首個人作品,「係咪好自戀呢件事,(唱《蒙着嘴》應唔應付到?)暫時未應付到,仲未可以邊跑邊唱到呢隻歌,但係試緊啦!」

MV一 shot落拍攝,姜濤親自度橋,「呢隻歌都係講一個人,唔需要好多人去執行,不如我自己嚟。」
MV一 shot落拍攝,姜濤親自度橋,「呢隻歌都係講一個人,唔需要好多人去執行,不如我自己嚟。」
雖然MV由姜濤執導,拍攝時花姐當然有畀意見。
雖然MV由姜濤執導,拍攝時花姐當然有畀意見。






未敢為MIRROR度橋

由於是獨子,姜B慣了自己解決問題,令他變得特別多諗頭,新歌主題早在一年前想好,「呢首歌唔係錄咗好耐,但係個idea諗咗好耐,我成日會諗好多idea,以前未入行仲係肥仔嘅時候,會幻想好多舞台表演嘅方式,到參加《造星》時候攞呢啲嘢出嚟,今次呢首歌就係啱我腦海中嘅畫面。(諗咁多橋使唔使寫低?)唔使,我會自動save,你𠵱家想要咩idea我都可以話畀你聽,以後大家要idea可以搵我,我隨時度畀你,我連之後第三、四首歌嘅idea都度好,差在歌未揀咋,我𠵱家就係針對呢啲idea搵一隻啱嘅歌。」姜B愈講愈興奮,「嘩!演唱會idea我都諗好咗。(咁勁?)勁呀!同埋我真係好想畀個好勁嘅Surprise大家。(成隊組合表演嘅idea?)成隊未輪到我諗,我淨係諗自己嗰part,成隊公司都可以搵我嘅。(花姐忍唔住插口:多橋唔等如buy你!)唔係,我自己嗰part佢buy咗啫!」勁cute的姜B開始認叻,「橋王𠵱家叫我橋王,(新晉橋王OK!)無論你高budget定低budget因應狀況調整。(𠵱家廣告雜誌?)我今次都係因應MV嘅budget做設計。」

姜濤跟林奕匡學過吹色士風後成老友,更獲前輩度身訂造新歌。
姜濤跟林奕匡學過吹色士風後成老友,更獲前輩度身訂造新歌。
「姜糖」在多處大廈外牆及港鐵站,注重資為姜濤宣傳新歌。
「姜糖」在多處大廈外牆及港鐵站,注重資為姜濤宣傳新歌。
正在台灣拍攝偶像劇《超感應學院》的姜濤,獲「姜糖」一口氣安排了三部應援車為偶像及劇組打氣。
正在台灣拍攝偶像劇《超感應學院》的姜濤,獲「姜糖」一口氣安排了三部應援車為偶像及劇組打氣。
姜濤入行前是肥仔一名,入行後他仍好介意體形成焦點。
姜濤入行前是肥仔一名,入行後他仍好介意體形成焦點。
姜濤上次推出《蒙着嘴說愛你》,MV有過200萬點擊率,連Do姐都跟他學跳歌曲舞步。
姜濤上次推出《蒙着嘴說愛你》,MV有過200萬點擊率,連Do姐都跟他學跳歌曲舞步。
早前姜濤現場唱《蒙着嘴說愛你》被指咬字不清,引發DJ麻利和「姜糖」網上罵戰。
早前姜濤現場唱《蒙着嘴說愛你》被指咬字不清,引發DJ麻利和「姜糖」網上罵戰。
其他文章
hd