首頁 即時娛樂

難得公開談家人 張達明離港拍戲對子女感愧疚

01/10/2020 02:53:00
張達明接受苑瓊丹訪問,罕有談及一對子女。
張達明接受苑瓊丹訪問,罕有談及一對子女。

張達明日前接受苑瓊丹邀請,亮相香港開電視節目《開工大吉77》,張達明笑指去年首次做電影監製,碌卡邀請「苑苑」客串,對方仗義補拍戲份,所以一口答允做訪問。達明話自己圈中打滾多年,台前幕後崗位都曾參與,但最愛仍是老本行演棟篤笑,「我做監製就唔係好在行喇!但呢個崗位就可以諗吓搵邊個朋友幫手,夠唔夠錢碌邊個卡客串咁,喺我病後可以圓監製夢。而咁多年最鍾意都係做棟篤笑,因為夠晒即興,試過做做吓唔記得對白,錯晒都照做落去,偏偏成為最好笑嗰一段。」

達明笑言一口答允亮相,為向苑仔還人情債。
達明笑言一口答允亮相,為向苑仔還人情債。
達明坦承當年經常離港拍戲,對子女感愧疚。
達明坦承當年經常離港拍戲,對子女感愧疚。





入行多年的張達明,近年一嘗得獎的滋味,更不相信自己獲獎,「兩年前去華鼎獎,初時以為係做頒獎嘉賓,到場先知自己攞獎,初時都唔信㗎!以為佢哋拍整蠱片,嗰次就第一次攞獎。到金像獎被認同意義好大,原來我係一個正式嘅演員,係交到貨嘅!當時好耐冇拍戲,可以參演係好吸引,我擔心自己身體做唔做到,當時真係好瘦,不過動作戲唔多,覺得自己可以應付到。」張達明坦言未完全康復,但盡量「包裝」自己見人,「好似今日要見苑仔,我咪化個妝,食番肥啲睇落飽滿啲。𠵱家我都呼籲各大監製搵我演皇帝呢類角色,坐喺度等人服侍,加上我做過周星馳同劉德華電影嘅皇帝,所以係『皇帝專業戶』。」早年因為工作離鄉別井,所以對家人有所愧疚:「梗係會啦!未病之前都有啦!當時去廣州拍戲,一走就要走半年,間唔中先返香港一日半日,離開仔女咁耐都有啲心痛。其實訪問我一向都少提家人,因為都係私事唔想交代,但係都想講多句,我嘅仔女對我好重要,係我人生最美麗嘅事,我係幸運兒,我會做所有嘅事令佢哋快樂。」


苑仔表示與達明見面感興奮,開心見到好友精神飽滿,「頭先知道佢重咗15磅,所以真係好開心,佢都好難得開腔講家人,我都要多謝佢。開頭佢話欠我人情債,其實冇啲咁嘅事,當年佢套戲要補拍,我以為係冇錢,點知都照有糧出,即係同一場戲收咗兩次錢,佢係一個好監製就真!」

達明鮮有在訪問中,提到兒子子由(右)和女兒子簥。
達明鮮有在訪問中,提到兒子子由(右)和女兒子簥。
達明跟苑仔老友鬼鬼,兩人更互笠高帽。
達明跟苑仔老友鬼鬼,兩人更互笠高帽。

難得跟老友暢談,達明笑得特別開懷。
難得跟老友暢談,達明笑得特別開懷。
達明更搞笑自封為演「皇帝專業戶」。
達明更搞笑自封為演「皇帝專業戶」。
其他文章
hd