首頁 即時娛樂

【頭條獨家】 拍《吃掉》談愛情數前度 張惠雅張蔓姿張蔓莎更信緣份

22/10/2020 21:58:00
張惠雅與孖女張蔓姿(右)張蔓莎(左)因早前參與ViuTV真人騷 《吃掉前男友》,令她們更相信緣份。
張惠雅與孖女張蔓姿(右)張蔓莎(左)因早前參與ViuTV真人騷 《吃掉前男友》,令她們更相信緣份。

張惠雅(Regen)與孖女張蔓姿(Gigi)張蔓莎(Sabrina)早前參與ViuTV真人騷《吃掉前男友》,齊齊大數前度。單身5年的Regen去年底以為遇到真命天子,不惜放低定下的標準,卻換來只能維持3個月的愛情。Gigi跟圈外男友因溝通不足分手,單身了3年。而年前跟吳肇軒公開戀情的Sabrina,早前兩人因性格不合分開。三女雖然單身,但她們認為寧缺勿濫,參與《吃》節目後,更加相信緣份,有愛情當然好,但單身一樣可以好精彩。撰文:杜淑霞 攝影:李維隆 服裝:Sandro(張蔓姿及張蔓莎)

Regen、Gigi和Sabrina坦承作為女藝人真的較難搵對象。
Regen、Gigi和Sabrina坦承作為女藝人真的較難搵對象。
三女雖然單身,但她們一致認為愛情應該寧缺勿濫。
三女雖然單身,但她們一致認為愛情應該寧缺勿濫。



32歲的Regen單身5年,去年底遇上細她5年多的圈外心儀對象,因男方仍未放低前度,令她打爛醋罈,最終戀情只維持了3個月,「我單身咗5年,有set到唔可以細我好多,同埋啱啱分手嘅人,點知set咁多嘢係廢嘅,舊年12月識佢嗰陣,佢係啱啱分咗手冇耐,但係佢同之前嗰個咁深感情,我唔係咁鍾意夾喺中間,有啲可惜,好難得搵到個自己好鍾意好欣賞嘅人。」


Gigi就單身了3年多,「我又冇覺得好慘痛,我好樂觀面對自己嘅生活,有好多嘢係緣份,我同ex做番朋友,冇特別傷,我喺佢身上仲學到好多嘢,佢係我好欣賞嘅人,大家仲有聯絡。」講到分手原因,Gigi說;「未一齊會有好多幻想,但一齊之後好多生活上、溝通上唔容易,同一個人好溝通好自如咁生活唔簡單,一切隨緣。」

單身5年的Regen去年底以為遇到真命天子,不惜放低定下的標準,卻換來只能維持3個月的愛情。
單身5年的Regen去年底以為遇到真命天子,不惜放低定下的標準,卻換來只能維持3個月的愛情。
Gigi 跟圈外男友因溝通不足分手,單身了3年,而年前跟吳肇軒公開戀情的Sabrina,早前因性格不合分開。
Gigi 跟圈外男友因溝通不足分手,單身了3年,而年前跟吳肇軒公開戀情的Sabrina,早前因性格不合分開。



吳肇軒問准家姐追妹妹


至於18年跟吳肇軒因拍《身後事務所》而撻着的Sabrina,就坦承已單身一段日子,但兩人再見亦是朋友,「我哋依然係好朋友,佢見證咗我成長嘅一個人,𠵱家只係換咗一個身份同角色去繼續陪住大家成長,我遇到問題問佢都會覆我,聚會都會見面,間唔中會聯絡。(分手原因?)性格上嘅嘢,大家各有各嘅追求,我諗大家都係事業心重,我哋都想大家事業好,會默默支持大家。我拍呢個節目都有同佢備定案,佢回覆都係好鼓勵性嘅。」原來當日兩人拍拖,孖生姐姐Gigi扮演重要角色,因Gigi讀演藝跟軒仔同班了4年,Gigi說:「軒仔聚會時有問過我,可唔可以追我阿妹,好尊重,當然我決定唔到任何嘢,佢鍾意就嘗試,最緊要對佢好。」



三人都認為作為女藝人,確實較難搵對象,Regen說:「會避忌啲,小心少少,自己圈子比較窄啲,呢個年代好多交友app,節目入面教我哋煮嘢食嗰個女人,佢都係交友app識佢老公,仲結埋婚,但係我哋身份唔可以玩呢啲嘢,變咗難啲囉!」不過三人都一致認為寧缺勿濫,Gigi說:「每個女仔都要獨立,當然嚮往戀愛,但係單身一樣可以好精彩。」Sabrina都認同,「自己準備拍拖先可以畀到幸福人,當然可以一齊去尋找,慢慢嗰個人就會出現。」

Regen、Gigi和Sabrina因拍攝《吃掉前男友》而成為好友。
Regen、Gigi和Sabrina因拍攝《吃掉前男友》而成為好友。
三女都被節目嘉賓張慧儀的故事所激勵。
三女都被節目嘉賓張慧儀的故事所激勵。
節目中,Gigi被林欣彤的愛情經歷感動而狂喊。
節目中,Gigi被林欣彤的愛情經歷感動而狂喊。
Regen跟前度分手後激瘦,體重只淨下80多磅。
Regen跟前度分手後激瘦,體重只淨下80多磅。
Sabrina跟吳肇軒分手後,再見亦是朋友,早前軒仔都有放兩人合照上社交網。
Sabrina跟吳肇軒分手後,再見亦是朋友,早前軒仔都有放兩人合照上社交網。
其他文章
hd