首頁 即時娛樂

【頭條獨家】相處不愛童話式浪漫 何雁詩同鄭俊弘互聞測體臭

23/10/2020 11:00:00
何雁詩同鄭俊弘相處不愛童話式浪漫,反而會互聞測體臭。
何雁詩同鄭俊弘相處不愛童話式浪漫,反而會互聞測體臭。

何雁詩(Step)最近推出新歌《基本戀愛套路》,她上次接受《頭條日報》訪問已預告創作了這首歌送給未婚夫鄭俊弘(Fred),當時她本打算給Fred驚喜,最終忍不住給了對方聽Demo,現在更順理成章找Fred充當MV男主角。Step坦承跟Fred的愛情並不如外界想像的童話式,反而平日相處非常簡單,絕不浪漫,只愛宅在梳化睇電視,互聞對方測體臭,已覺得好滿足。撰文:杜淑霞 攝影:李維隆 場地:The Air (The ONE)

Step明年最大的期望是擺到酒及開到騷。
Step明年最大的期望是擺到酒及開到騷。
提到跟Fred互聞體臭,Step忍不住尷尬狂笑。
提到跟Fred互聞體臭,Step忍不住尷尬狂笑。



Step最初都擔心送歌給未婚夫這舉動太老土,但最後都決定隨性去做,「我本身係諗住唔做,我本嚟唔想將婚姻變咗一個商業嘅用途,但係寫寫吓Demo時,覺得亦都係紀錄咗我呢一刻一個好真實嘅感覺,因為我喺呢個時候勉強做一首悲情歌,反而格格不入,𠵱家做一首歌適合我結婚待嫁就嚟做人妻嘅感覺,反而合理得多。」




沖涼突然靈感到

講到Step的創作過程,原來都幾搞笑,「大概係Fred求婚之後冇幾耐寫,今年年頭度,我最深刻係喺廁所個洗水盤嘅水喉前面,臨沖涼之前突然間好似有啲計喎!咁就即刻搵手機錄咗,嗰時我冇諗住攞嚟做一首歌,因為喺年頭嘅時候未試過有廣東歌出過,去到年中嘅時候,我再畀監製Cousin Fung聽,佢覺得首歌有啲特別,仲將我啲一忽忽嘅歌,砌埋成為一首好完整嘅Demo。」至於歌詞方面,Step搵來第一次合作的Oscar填詞,還將平日跟Fred生活的日常做主題,「好多時外界覺得我同Fred關係比較多波折,比較戲劇化,其實我哋平時日常生活係好簡單,唔係好似公主王子咁。首歌用《基本戀愛套路》係有啲諷刺成份喺裏面,一般戀愛嘅套路可能係男仔一定送花,第一次約會食法國餐飲紅酒,但係反而我哋嘅套路喺屋企好簡單食餐飯就已經滿足,同外界覺得套路唔同。」

Step邀請了未婚夫Fred出任《基本戀愛套路》MV男主角。
Step邀請了未婚夫Fred出任《基本戀愛套路》MV男主角。
MV中,Step與Fred的相處方式,正是生活的日常。
MV中,Step與Fred的相處方式,正是生活的日常。



望明年擺酒開騷

Step覺得跟Fred的浪漫定義,跟一般人大不同,「我哋對浪漫定義,都唔係好傳統唔係買花,或者講啲好sweet嘅嘢就係。我覺得最浪漫反而唔係求婚嗰時,而係喺梳化度我聞吓佢腳指,佢又聞吓我嘅胳肋底,哈哈!我覺得簡單先係最浪漫。」對於這種怪癖,她再次解釋,「呢單嘢係有原因,腳指我哋自己又聞唔到,但好注重個人衛生,唯有幫對方check吓,好原始地好似馬騮都係會幫對方檢查捉蚤,我哋都係呢個套路,我哋係猴子嘅基本戀愛套路,哈哈!」




即將於11月7日跟鄭俊弘註冊結婚,暫定明年才擺酒的Step,當了獨立歌手接近一年,推出了3首風格不同的單曲,Step很滿意這年的音樂發展,未想專心做人妻,反而已定好明年的音樂目標,「做完第3首歌,我已經做緊第4首歌,出年做完第4首歌,希望開到騷回饋番我嘅歌迷,我實在好掛住唱live,成年冇唱過,所以我對於明年嘅期望係又擺到酒又開到騷。」

Step和Fred的浪漫求婚過程,並非他們心目中最渴望的浪漫。
Step和Fred的浪漫求婚過程,並非他們心目中最渴望的浪漫。
早前Step和Fred已進行了過大禮儀式。
早前Step和Fred已進行了過大禮儀式。
Step早前放片上社交網被指晒性感,令她將來會更小心。
Step早前放片上社交網被指晒性感,令她將來會更小心。
近日Step愛上滾軸溜冰,難得Fred也喜歡。
近日Step愛上滾軸溜冰,難得Fred也喜歡。
其他文章
hd